ۇلىبريتانيا ۋكرايناعا "چەللەندجەر" تانكىلەرىن بەرەتىنىن رەسمي مالىمدەدى

ۇلىبريتانيا الداعى ۋاقىتتا "چەللەندجەر-2" ماركالى اۋىر تانكىلەرىنىڭ 14 داناسىن ۋكرايناعا جەتكىزەدى. بۇل جونىندە بريتان ۇكىمەتىنىڭ مالىمدەمەسىندە جازىلعان. وسىلايشا ۇلىبريتانيا ۋكرايناعا باتىستا شىعارىلعان تانكىلەردى جەتكىزەتىن العاشقى ەلگە اينالادى، -دەپ جازدى ازاتتىق راديوسى.

بۇعان دەيىن ناتو وداقتاستارى نەمىستىڭ "لەوپارد-2" تانكىلەرىن دە ۋكرايناعا بەرۋ ماسەلەسىن تالقىلاعان. ولاردى كيەۆكە بەرۋدى ازىرگە پولشا جانە بىرقاتار ەلدەر قۋاتتاعان. ال بەرلين اتالعان تەحنيكا ءتۇرىن جەتكىزەتىنىن ءتيىستى دارەجەدە راستاعان جوق. لوندوننىڭ شەشىمىن بەرليندى ءبىرشاما باتىلىراق بولۋعا يتەرمەلەۋ قادامى رەتىندە باعالاپ وتىرعان ساراپشىلار دا بار.

بۇعان دەيىن فرانتسيا، گەرمانيا جانە اقش ۋكرايناعا بروندى تەحنيكالارىن جەتكىزەتىنىن مالىمدەگەن. ماسەلە جاياۋ اسكەرگە ارنالعان تەحنيكا مەن بارلاۋ كولىكتەرى جونىندە بولىپ وتىر.

بريتان ۇكىمەتىنىڭ مالىمدەمەسىندە "رەسەيدى كەرى ىسىرىپ، بەيبىتشىلىكتى نىعايتۋ ماقساتىندا" پرەمەر-مينيستر ريشي سۋناكتىڭ ۋكراينانى ديپلوماتيالىق جانە اسكەري تۇرعىدا قولداۋدى ءجون كورگەنى جازىلعان.

بريتان پرەمەرىنىڭ پىكىرىنشە، ۋكراينانى قولدايتىن ناعىز قولايلى ءسات تۋىندادى، سەبەبى رەسەي اسكەرى "جابدىقتار جاعىنان قينالىپ، اسكەري رۋحى ءتۇسىپ كەتكەن".

تانكىدەن بولەك، ۇلىبريتانيا ۋكرايناعا 30 شاقتى ءوزى زاريادتالاتىن AS90 ماركالى گاۋبيتسا بەرەدى. رەسمي مالىمدەمە 16 قاڭتاردا پارلامەنتتە جاسالادى.

جۋىردا ريشي سۋناك ۋكراينا باسشىسى ۆلاديمير زەلەنسكيمەن تەلەفون ارقىلى سويلەسكەن. اڭگىمەدەن كەيىن زەلەنسكي سۋناكقا "ۋكراين ارمياسىن تەك شايقاس الاڭىندا عانا كۇشەيتىپ قانا قويماي، وزگە وداقتاستار ءۇشىن دۇرىس سيگنال بولاتىن" شەشىمى ءۇشىن العىس ايتقان. شەشىم جايلى تولىق اقپارات ايتىلمادى.