بىشكەكتە العاشقى حالىق قۇرىلتايى ءوتىپ جاتىر

ۇيىمداستىرۋ كوميتەتىنىڭ جەتەكشىسى، مەملەكەتتىك حاتشى سۇيۇنبەك قاسمامبەتوۆتىڭ مالىمدەۋىنشە قۇرىلتاي دەلەگاتتارى پرەزيدەنت سادىر جاپاروۆپەن، جوگوركۋ كەنەش دەپۋتاتتارىمەن جانە ۇكىمەت مۇشەلەرىمەن بىرگە بىرقاتار ماسەلەنى تالقىلايدى.

قۇرىلتايعا قاتىسۋشىلار اقساقالدار كەڭەسىنىڭ قۇرامىن بەكىتتى. قادىر قوشاليەۆ كەڭەس توراعاسى بولىپ سايلاندى.

16 تامىزدا پرەزيدەنت سادىر جاپاروۆ بيىل 25 قاراشادا "حالىق قۇرىلتايىن شاقىرۋ تۋرالى" جارلىققا قول قويدى. حالىق قۇرىلتايى تۋرالى ەرەجە 2021 جىلعى 5 مامىردا كۇشىنە ەنگەن جاڭا كونستيتۋتسياعا ەنگەن. مۇنداي ينستيتۋتتىڭ پايدا بولۋى قىرعىزستاندا داۋ تۋعىزدى.

پرەزيدەنت اكىمشىلىگىنىڭ مالىمدەۋىنشە، حالىق قۇرىلتايى تالقىلاۋشى، باقىلاۋشى جيىن رەتىندە قوعام دامۋىنىڭ باعىتتارى جونىندە كەڭەس بەرەدى. پرەزيدەنت سادىر جاپاروۆ قۇرىلتايدا بيلىكتىڭ بارلىق تارماقتارى حالىققا ءبىر جىلدا اتقارىلعان جۇمىسى تۋرالى ەسەپ بەرىپ، قۇرىلتايدا ايتىلعان ۇسىنىستار مەن تىلەكتەردى تىڭدايدى.

جوگوركۋ كەنەشتەگى دەپۋتاتتاردىڭ كەيبىرى قۇرىلتاي ينستيتۋتىن پارلامەنتتىڭ كەيبىر فۋنكتسيالارىن قايتالايتىن زاڭسىز ۇيىم دەپ سانايدى. بۇعان قوسا، دەپۋتاتتار پرەزيدەنتتىڭ قۇرىلتاي تاعايىنداۋ تۋرالى جارلىعىن دا زاڭسىز دەپ ەسەپتەيدى، ويتكەنى بۇنىڭ الدىندا پارلامەنت "حالىق قۇرىلتايى تۋرالى" كونستيتۋتسيالىق زاڭ جوباسىن قابىلداماعان.