17 قاراشادا قىرعىزستاندا وش وبلىسىنا قاراستى ۇزگەن اۋدانىنىڭ اكىمشىلىك عيماراتى الدىنا ونداعان ادام جينالىپ، بيلىكتەن كەمپىراباد سۋ قويماسى جەرلەرىن وزبەكستانعا بەرمەۋدى تالاپ ەتتى. بۇل تۋرالى ورتالىق ازيا جاڭالىقتار قىزمەتى جازدى.

ولار ەل پرەزيدەنتى سادىر جاپاروۆقا، پارلامەنت دەپۋتاتتارىنا ۇندەۋ ارناپ، بۇعان دەيىن وزبەكستانمەن جاسالعان كەلىسىمدى ماقۇلداماۋىن سۇرادى.

سونىمەن بىرگە، ۇزگەندە جينالعاندار "كەمپىراباد ءىسى" بويىنشا ۇستالعان بەلسەندىلەر مەن ساياساتكەرلەردى بوساتۋىن تالاپ ەتتى.

بىشكەكتەگى م.گوركي اتىنداعى ساياباققا ءدال وسىندا تالاپپەن جيىرما شاقتى ادام جينالدى.

جوگوركۋ كەنەش بۇگىنقىرعىز-وزبەك مەملەكەتتىك شەكاراسىنداعى كەيبىر جەر تەلىمدەرى جونىندەگى كەلىسىم-شارتقا جانە كەمپىراباد سۋ قويماسىنىڭ سۋ رەسۋرسىن بىرگە باسقارۋ جونىندەگى كەلىسىمدى قاراپ جاتىر. پارلامەنت وتىرىسىندا ۇقمك توراعاسى قامچىبەك تاشيەۆ بايانداما جاسادى.

3 قاراشادا بىشكەكتە قىرعىزستان مەن وزبەكستان سىرتقى ىستەر مينيسترلەرى قىرعىز-وزبەك مەملەكەتتىك شەكاراسىنداعى كەيبىر جەر تەلىمدەرى جونىندەگى كەلىسىم-شارتقا جانە كەمپىراباد سۋ قويماسىنىڭ سۋ رەسۋرسىن بىرگە باسقارۋ جونىندەگى كەلىسىمگە قول قويدى. 14 قاراشادا وزبەكستان پارلامەنتىنىڭ زاڭ شىعارۋشى پالاتاسى كەلىسىمدى راتيفيكاتسيالادى.

15 قاراشادا جوگوركۋ كەنەشتىڭ حالىقارالىق ىستەر، قورعانىس، قاۋىپسىزدىك جانە كوشى-قون ماسەلەلەرى جونىندەگى كوميتەتى قۇجاتتى بىردەن ءۇش وقىلىمدا ماقۇلدادى.

قىرعىزستاندا وپپوزيتسيا جاعىنداعى ساياساتكەرلەر مەن بەلسەندىلەر وزبەكستانمەن كەلىسىمدى قولداماي، كەمپىراباد سۋ قويماسىنىڭ جەرلەرىن كورشى مەملەكەتكە بەرمەۋدى تالاپ ەتتى.