توقاەۆ الماتىلىقتارمەن كەزدەسكەندە ءوزىنىڭ اتۋعا بۇيرىق بەرگەنىن دۇنيە ءجۇزى قولدادى دەپ اقتالدى

16 قاراشادا الماتى «جۇرتشىلىعىمەن» كەزدەسكەن پرەزيدەنت قاسىم-جومارت توقاەۆ قاڭتار وقيعاسى جونىندە ايتتى. بۇل جونىندە «ازاتتىق» راديوسى حابارلادى.

توقاەۆ «cول قيىن كۇندەردە بۇكىل قازاقستان حالقى الماتىلىقتاردىڭ تىلەۋىن تىلەدى. وكىنىشكە قاراي، قازىر كەيبىرەۋلەر قىلمىستىق ارەكەتتى حالىق كوتەرىلىسى دەپ اقتاۋعا تىرىسىپ ءجۇر» دەپ مالىمدەدى، الايدا كىمدەردى ايتقانىن ناقتىلامادى.

«حالىقتىڭ بەيبىت شەرۋى مەن قاراقشىلار جاساعان قاندى قىلمىستىڭ اراسىن اجىراتا ءبىلۋ كەرەك» دەگەن پرەزيدەنت بيلىكتىڭ «جەدەل جانە باتىل ارەكەتىنىڭ ارقاسىندا» ەلدە «ءتارتىپ دەرەۋ ورنادى» دەدى.

«قابىلداعان شەشىمدەرىمىز جانە ءىس-ارەكەتىمىز بۇكىل دۇنيە جۇزىندە تۇسىنىستىكپەن مويىندالدى، ءتىپتى، قولداۋ تاپتى» دەدى توقاەۆ.

قازان ايىندا «الماتى وبلىسى جۇرتشىلىعىمەن كەزدەسۋ» كەزىندە دە توقاەۆ «بۇزاقىلار مەن لاڭكەستەردەن باتىر جاساۋدىڭ ەش قاجەتى جوق» دەپ وسىعان ۇقساس مالىمدەمە جاساعان ەدى.

16 قاراشادا توقاەۆ قاڭتار كەزىندە "ەلدەگى جاعدايدى ادەيى ۋشىقتىرعان ادامدار" بولعانىن جەتكىزدى. پرەزيدەنتتىڭ ايتۋىنشا، ولار «قوعامدى ىدىراتۋدى» كوزدەپ، «ءتۇرلى امالدارمەن نارازى كوڭىل-كۇيدى ارتتىرعان».«جۇرتتى كوشەگە شىعۋعا ۇندەپ»، «ونسىز دا كۇردەلى جاعدايدى» ۋشىقتىرعان. بىراق اقىر سوڭىنا قاراي «ۇيلەرىنە تىعىلىپ»، «جاعداي قالپىنا كەلگەندە ادىلەت پەن ازاماتتاردىڭ يگىلىگىن قالايتىن ءتارىزدى الاڭعا قايتا شىققان».

«ولار ءۇشىن بۇل انشەيىن ويىن، ولاردى الەۋمەتتىك جەلىدەگى تانىمالدىق پەن جاسىرىن دەمەۋشىلەردىڭ نازارى عانا قىزىقتىرادى» دەدى. توقاەۆ مۇندايدى «سايلاۋ الدىندا ايتۋ» قالىپتاسپاعان تاجىريبە ەكەنىن، الايدا «ءادىلىن ايتۋدى» جون كورگەنىن جەتكىزدى.

قاڭتار كەزىندە قازا بولعان 238 ادامنىڭ باسىم بولىگى الماتىدا كوز جۇمعان. توقاەۆ قاڭتار كەزىندە «20 مىڭ تەرروريست شابۋىلدادى» دەپ مالىمدەپ، كۇش قۇرىلىمدارىنا «ەسكەرتۋسىز وق اتۋعا بۇيرىق» بەرگەن. الايدا كەيىن بيلىك «20 مىڭ تەرروريست» جايلى مالىمدەمەنى جوققا شىعارعان.

بيلىك قازا تاپقاندار اراسىندا كەزدەيسوق وققا ۇشقاندار بار ەكەنىن مويىنداعانىمەن، مارقۇمداردىڭ كوبىنىڭ ۇستىنەن تەرروريزم، جاپپاي تارتىپسىزدىك، قارۋ ۇرلاۋ، توناۋ، مۇلىك جويۋ باپتارىمەن ءىس قوزعاعان. ءىستى بولعان مارقۇمداردىڭ تۋىستارى نەگىزسىز جالا جاۋىپ وتىر، تەرگەۋشىلەر دالەل كەلتىرمەي وتىر دەپ شاعىمدانعان. وسىعان دەيىن كەيبىر ساراپشىلار قاڭتار وقيعاسىنان بەرى ون اي وتسە دە، توقاەۆتىڭ "لاڭكەستەر" جايلى مالىمدەمەسىن راستايتىن دالەل تابىلماعانىن ايتقان.

حالىقارالىق ۇيىمدار رەسمي استانانى قاڭتار وقيعاسىن تەرگەۋگە كومەكتەسۋگە ىنتا بىلدىرسە دە، قازاقستان بيلىگى ۇسىنىستى قابىلداماعان.

توقاەۆتىڭ «الماتى جۇرتشىلىعىمەن كەزدەسۋىنىڭ» قايدا وتەتىنى الدىن الا حابارلانبادى. اقوردا حابارلاماسىندا دا قايدا ءوتىپ جاتقانى ايتىلمايدى. سارسەنبى كۇنى قالادا پوليتسەيلەر كوبەيىپ، كولىك كەپتەلىسى پايدا بولدى.

توقاەۆ «الماتى جۇرتشىلىعىمەن» كەزەكتەن تىس پرەزيدەنت سايلاۋىنا ساناۋلى كۇندەر عانا قالعان شاقتا كەزدەسىپ وتىر. شامامەن 2 ملن حالقى بار قازاقستانداعى ەڭ ءىرى قالا سوڭعى سايلاۋلاردا سايلاۋعا قاتىسۋ بەلسەندىلىگى جانە بيلىك كانديداتىن قولداۋ بويىنشا ەڭ تومەن كورسەتكىش كورسەتكەن.