قاڭتاردا اتىمەن قوسا وققا ۇشقان ەرنازار قىرىقباەۆ ءىسى: سوت ايىپتالۋشىنى التى جىل تۇرمەگە كەستى

الماتى سوتى قاڭتار وقيعاسى كۇندەرى تالدىقورعان قالاسىنداعى اسكەري ءبولىم ماڭىندا مال باعۋعا شىققان 24 جاستاعى ەرنازار قىرىقباەۆقا وق اتتى دەپ ايىپتالعان كۇدىكتى مارك زلۋنياەۆتى التى جىل تۇرمەگە كەستى. بۇل جونىندە سوت زالىنان ازاتتىق ءتىلشىسى حابارلادى، -دەپ جازدى راديو ازاتتىق.

تالدىقورعان قالاسىنداعى شابۋىلداۋشى اسكەري دەسانت ءبولىمىنىڭ قىزمەتكەرى مارك زلۋنياەۆ سارسەنبى كۇنى سوت زالىنان بىردەن قاماۋعا الىندى.

ەكى تاراپ تا سوت ۇكىمىمەن كەلىسپەدى. زلۋنياەۆتىڭ ادۆوكاتى اسكەري قىزمەتكەر قاڭتار كەزىندە "مىندەتىن ورىنداپ، اسكەري ءبولىمدى قورعادى، سول ءۇشىن ونى اقتاۋ كەرەك" دەدى. ال جابىرلەنۋشى جاقتىڭ ادۆوكاتى ء"ىستى بيلىك وكىلەتىن اسىرا پايدالانۋ ەمەس (451-باپ), قاساقانا ادام ءولتىرۋ بابى (99-باپ) بويىنشا قاراۋى ءتيىس ەدى" دەدى.

وتكەن اپتادا مالشى ولگەن جەردە كوشپەلى سوت وتىپ، سول كەزدە ادۆوكات "مەديتسينا قىزمەتكەرى مالشى مەن اتىنىڭ جول بويىندا ولگەنىن ايتتى، بۇل مالشىنى شاۋىپ كەلە جاتقاندا ەمەس، جول بويىندا كەتىپ بارا جاتقاندا اتقانىن دالەلدەي تۇسەدى" دەگەن ەدى.

ال ونىڭ الدىنداعى سوتتا تالدىقورعان قالاسىنداعى شابۋىلداۋشى اسكەري دەسانت ءبولىمىنىڭ باسشىلارى "وققا ۇشقان ەرنازار قىرىقباەۆ اسكەري بولىمگە قاۋىپ توندىرەتىن جەرگە دەيىن جاقىنداعانىن", كۇدىكتىنىڭ ارەكەتى دۇرىس بولعانىن ايتقان.

سارسەنبى كۇنى سوتتا جابىرلەنۋشى جاقتىڭ ادۆوكاتى ارتىندا ايەلى مەن بەس بالاسى قالعان مارقۇمنىڭ وتباسىنا ماتەريالدىق-مورالدىق شىعىن رەتىندە 65 ملن تەڭگە ءوندىرىپ الۋ بويىنشا ازاماتتىق شاعىم تۇسىرەتىنىن دە ايتتى.

24 جاستاعى ەرنازار قىرىقباەۆ قاڭتاردىڭ بەسىندە تالدىقورعان قالاسىنداعى اسكەري گارنيزون شەتىنەن ءوتىپ بارا جاتقاندا اتىمەن قوسا وققا ۇشقان. ونى ىزدەپ بارعان جۇمىسشىلارعا دا جاۋىنگەرلەر وق اتىپ، قول كوتەرۋگە ماجبۇرلەگەن. جاۋىنگەرلەر "توقتا!" دەگەن بۇيرىققا باعىنباعان سالت اتتىنى اتىپ، جەدەل جاردەمگە سالىپ جىبەرگەنىن ايتقان. تۋىستارىنا ەرنازار قىرىقباەۆتىڭ دەنەسىن ءبىر اپتادان سوڭ عانا بەرگەن. وقيعانى تەكسەرگەن اسكەري پروكۋراتۋرا كوپ ۇزاماي-اق "اسكەري قىزمەتكەرلەردىڭ ىسىندە قىلمىستىق سيپات بار" دەگەن تۇجىرىم جاساعان.

ەرنازار قىرىقباەۆ ىسىنە بايلانىستى سوت 20 قازاندا باستالعان.

قاڭتاردىڭ بەسىندە تالدىقورعاندا بولعان قاڭتار وقيعاسى كەزىندە بىرنەشە ادام قازا بولىپ، قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ ەسكەرتكىشى قۇلاتىلعان. دۇربەلەڭ اياقتالعان سوڭ دا ەكى وتباسىعا جاۋىنگەرلەر وق اتىپ، بەس ادام ولگەنى انىقتالعان.