"مەموريال" ادام قۇقىقتارىن قورعاۋ ورتالىعىنىڭ ورتالىق ازيا بويىنشا باعدارلاماسىنىڭ ديرەكتورى ۆيتالي پونومارەۆتى قىرعىزستاننان دەپورتاتسيالادى. بۇل تۋرالى ازاتتىقتىڭ قىرعىز قىزمەتىنە ء"بىر ءدۇينو قىرعىزستان" قوزعالىسى حابارلادى، -دەپ جازدى ورتالىق ازيا جاڭالىقتار قىزمەتى.

ۇيىم مالىمەتىنشە، پونومارەۆ ادام قۇقىقتارى جونىندەگى كينوفەستيۆالعا قوناق رەتىندە شاقىرىلعان، الايدا ونىڭ قىرعىزستاندا ءجۇرىپ-تۇرۋىنا شەكتەۋ قويىلۋىنا بايلانىستى قۇقىق قورعاۋشى بۇل شاراعا قاتىسا المادى.

قىرعىزستان ۇلتتىق قاۋىپسىزدىك جونىندەگى مەملەكەتتىك كوميتەتى شەكارا قىزمەتىندەگىلەر ازاتتىققا پونومارەۆتى دەپورتاتسيالاعانىن راستادى.

"شەكارا قىزمەتى باسقا دا مەملەكەتتىك قۇرىلىمدارىن بۇيرىقتارىن ورىندايدى. وعان قىرعىزستانعا كىرۋگە تىيىم سالىنعان. پونومارەۆ مىرزا نە ءۇشىن تىيىم سالىنعانىن بىلەدى. ءبىز اتقارۋشى ورگانبىز", - دەپ حابارلادى ۇقمك شەكارا قىزمەتىنىڭ ءباسپاسوز قىزمەتى.

14 قاراشادا "ماناس" اۋەجايىندا ۆيتالي پونومارەۆ كەدەن باقىلاۋىن ءوتۋ كەزىندە ۇستالدى. شەكاراشىلاردىڭ حابارلاۋىنشا، پونامارەۆقا قىرعىزستانعا كىرۋگە 2017 جىلى تىيىم سالىنعان، ال 2020 جىلى تىيىم مەرزىمى ۇزارتىلعان. مالىمەتتى باسقا دا دەرەككوزدەر كومەگىمەن راستاۋ مۇمكىن بولماي وتىر.