تيبەتتىڭ ورتالىعى لحاسادا كوۆيد-19 كەسىرىنەن قامالىپ وتىرعان تۇرعىندار وتكەن سارسەنبىدە تۇستەن باستالىپ ءتۇن ايعانشا ۇلكەن شەرۋگە شىقانى تۋرالى بەينەجازبادار جاريالانىپ جاتىر.

بەيرەسمي دەرەككە قاراعاندا ءۇش ايدان بەرى كارانتينگە جابىلعان قالاداعى نارازىلىققا شىققانداردىڭ دەنى وسىندا كەلگەن ۇلتى قىتاي ەڭبەك ميگرانتتار ەكەنى ايتىلادى.

بەينە جازبالاردا جۇزدەگەن ادامنىڭ كوشەگە جينالعانى، قۇزىرلى ورگان ادامدارىنىڭ ءبىر شەتىنەن بوگەت جاساپ تۇرعانىن ءارى داۋىس زورايتقىشپەن نارازىلارعا قاراتا «تۇسىنىستىكپەن قاراپ، كەرى قايتۋدى» سۇراپ تۇرعانىن ال، باسقا بەينەجازبالاردا ءتۇن مەزگىلىندە كوشەدە قاپتاعان قالىڭ ادامنىڭ ايقايلاپ سويلەپ جۇرگەنى مەن «ءبىز ۇيگە قايتقىمىز كەلەدى» دەگەن پلاكات ۇستاپ جۇرگەندەرى بايقالادى.

الەمدىك باق-تاردا وسى بەينەلەردىڭ كەيبىرى لحاسادا تۇسىرىلگەنىن راستادى. ال بۇل بەينەجازبالار قىتايلىق الەۋمەتتىك جەلىلەردەن جويىلعانىمەن Twitter-دە جاريالانىپ جاتىر.

ساراپشىلاردىڭ بولجاۋىنشا بۇل نارازىلىقتىڭ سوڭى شەرۋلەتكەن ازاماتتاردى پوليتسيا قىزمەتكەرلەرىنىڭ زورلىقپەن جانشۋىنا اپارۋى مۇمكىن.

ەسكە سالا كەتسەك بۇعان دەيىن كارانتينگە قامالعان شينجاڭدىق تۇرعىنداردىڭ دا مۇشكىل ءحالى جاريالانعان-تۇعىن.