سومالي استاناسى موگاديشودا 29 قازاندا كۇشتى ەكى جارىلىس بولدى. جەرگىلىكتى بيلىك كەمىندە ءجۇز ادامنىڭ قازا بولعانىن، 300-دەن استام ادامنىڭ جارالانعانىن ايتتى. تەراكتىنى ء"ال-شابااب" ءدىني توبى جاساعان بولۋى مۇمكىن دەگەن بولجام ايتىلدى. بۇل تۋرالى ورتالىق ازيا جاڭالىقتار قىزمەتى جازدى.

ەكى جارىلىس تا ءبىر جەردە: قالا ورتاسىندا ءبىلىم مينيسترلىگى جانىندا ادام كوپ جۇرەتىن كوشەلەر قيىلىسىندا بولعان. اۋەلى جارىلعىش زات ورناتىلعان كولىك جارىلعان، وقيعا ورنىنا پوليتسيا مەن جەدەل جاردەم بريگاداسى جەتكەن كەزدە ەكىنشىسى جارىلعان.

ءدال وسى قيىلىستا 2017 جىلى 14 قازاندا تاعى ءبىر ءىرى تەراكت بولعان: ول كەزدە جارىلىستان شامامەن 500 ادام قازا تاۋىپ، 300 ادام جارالانعان.

سومالي پرەزيدەنتى حاسسان شەيح ماحاممۋد وقيعانى "قاتاڭ، قورقاق تەرروريستىك شابۋىل" دەپ اتادى. ول تەراكتىگە ء"ال-شابااب" ءدىني توبىن كىنالادى. ال ء"ال-شابااب" ادەتتە جاساعان تەراكتىلەرىن مويىندامايدى.

ء"ال-شابااب" – ء"ال-كايدا" جانە "بوكو حارام" تەرروريستىك توپتارىمەن بايلانىستى راديكالدى جيھادتىق توپ. ۇيىم سودىرلارى سوماليدەگى اۋىلداردىڭ بىرقاتار بولىگىن باقىلايدى. بۇعان دەيىن ەلدە بولعان تەراكتىلەردىڭ كوبىن وسى ۇيىم جاساعان. جىل باسىندا موگاديشو مەن وزگە قالالاردا قوناق ۇيدە بولعان جارىلىستار، بەيبىت ازاماتتاردى سوتسىز دارعا اسۋ، اسكەري بازالارعا شابۋىل ءتارىزدى اۋىر قىلمىستاردىڭ ار جاعىندا وسى توپتىڭ تۇرعانى ايتىلادى.