فوتو: ازاتتىق راديوسى

تاجىكستاندا الەۋمەتتىك ماسەلەلەردى كوتەرىپ، شەنەۋنىكتەردى ءجيى سىنايتىن تانىمال جۋرناليست ءارى بلوگەر دالەر ءيمومالي 10 جىلعا باس بوستاندىعىنان ايرىلدى. بۇل تۋرالى ورتالىق ازيا جاڭالىقتار قىزمەتى جازدى.

سوت ۇكىمى 17 قازانزا كەشكە دۋشانبەدەگى تەرگەۋ يزولياتورىندا وقىلدى. مالىمەتتى ەرتەسىنە سوتتالعان ءجۋرناليستىڭ تۋىستارى راستادى. سوت ءجۋرناليستى ون جىلعا سوتتاپ قانا قويماي، وعان ايىپپۇل سالعان.

ءيموماليدىڭ ادۆوكاتى سادۋللو كايۋمزودا 18 قازاندا وزودي راديوسىنا سوت ۇكىمى شىققانىن راستادى، بىراق باسقا دا مالىمەت بەرۋدەن باس تارتتى. تۋىستارىنىڭ ايتۋىنشا، دالەرگە ايىپپۇل سالىنعان، بىراق ونىڭ كولەمى ازىرگە بەلگىسىز.

دالەر ءيمومالي قىلمىس تۋرالى جالعان مالىمەت تاراتتى، زاڭسىز كاسىپپەن شۇعىلداندى، تىيىم سالىنعان ۇيىم قىزمەتىنە ارالاستى دەپ تانىلدى. بۇنىڭ الدىندا دەرەككوزدەر جۋرناليست تاعىلعان ايىپتاردى جوققا شىعارعانىن، تەك زاڭسىز كاسىپپەن اينالىسقانىن عانا مويىنداعانىن حابارلاعان.

پروكۋرور دالەر يموماليگە 10,5 جىل سۇراعان.

دالەر ءيمومالي بيىل 15 ماۋسىمدا ۇستالدى. جۋرناليسكە تاجىكستاندا تىيىم سالىنعان "24 توپ" ساياسي قوزعالىسىمەن بايلانىس ورناتتى دەگەن ايىپ تاعىلدى. الايدا قوزعالىس باسشىلارى ءيمومالي ۇيىم قۇرامىندا بولماعانىن، ونىمەن ەشقاشان ارالاسپاعانىن مالىمدەدى.

كەيىنگى ءۇش ايدا تاجىكستاندا جەتى جۋرناليست پەن بلوگەر قاماۋعا الىندى. دۋشانبەدەگى شوحمانسۇر اۋدانىنىڭ سوتى 4 قازاندا ابدۋللو گۋرباتيدى ءۇش ءتۇرلى ايىپپەن، سونىڭ ىشىندە ەكسترەميستىك ۇيىمعا قاتىستى دەگەن باپپەن 7,5 جىلعا سوتتادى.

حالىقارالىق ادام قۇقىقتارىن قورعاۋشى ۇيىمدار مەن باتىس ەلدەرى تاجىكستان بيلىگىن جۋرناليستەرگە قىسىم كورسەتۋدى، ولاردى قۋدالاۋدى دوعارۋدى تالاپ ەتتى. الايدا دۋشانبە بۇل ۇندەۋلەرگە ءمان بەرمەي وتىر.

وسى رەتتا ەلىمىزدە دە تاۋەلسىز جۋرناليست ND ارناسىنىڭ اۆتورى دۋمان مۇحامەدكارىمدى الداعى كەلە جاتقان 25 قازانداعى زاڭسىز ميتينگتى ۇيىمداستىردى دەپ 488 باپتىڭ 7 تارمعىمەن  12 قازاندا 15 تاۋلىككە قامالعانىن ەسكە سالامىز.