الماتىلىق ەنتۋزياستەر تۇسىرگەن «باۋىر» ءفيلمى كورەرمەنگە جول تارتتى. كينوكارتينانى 21 ساۋىردەن باستاپ ەلىمىزدىڭ بارلىق كينوتەاترىندا كورۋگە بولادى.

«باۋىر» - كريمينالدى دراما جانرىنداعى تولىقمەتراجدى فيلم. تۋىندى شىنايى وقيعاعا نەگىزدەلگەن. كارتينادا قيىندىققا تاپ بولىپ، ودان شىعۋ جولىن ىزدەگەن ەكى جىگىتتىڭ وقيعاسى سۋرەتتەلەدى. ءفيلمنىڭ جەلىسى بويىنشا، كريمينالدى الەمگە ءتۇسىپ، ماڭداي تەرمەن ەمەس، وڭاي جولمەن پايدا تابۋدى كاسىپ ەتكەن جىگىت اقىرى تۇتىلىپ، تۇرمەگە تۇسەدى. الايدا، وعان كىشى باۋىرى كومەكتەسىپ، اعاسىن كولەڭكەلى الەمنەن الىپ شىعادى. ال سەن، باۋىرىڭ ءۇشىن نە ىستەي الاسىڭ؟

فيلم رەجيسسەرى ءارى يدەيا اۆتورى شىڭعىس ابدىبەك تىرناقالدى تۋىندىسىنىڭ «بيۋدجەتسىز» تۇسىرىلگەنىن ايتتى:  «بۇل كينو ارقىلى جاستاردىڭ قىلمىستىق جولعا تۇسپەۋىن، ونىڭ زاردابى اۋىر بولاتىنىن كورسەتكىمىز كەلدى. «ۇرلىق ءتۇبى – قورلىق» دەپ تەگىن ايتپايدى. سونىمەن بىرگە، وتباسى قۇندىلىعىن ناسيحاتتاعىمىز كەلدى. باۋىرى ءۇشىن جان الىسىپ، جان بەرۋگە دايىن جىگىتتىڭ ەرلىگى بارشاعا ۇلگى بولسىن دەدىك. ءفيلمدى جۇرت كورىپ، باعاسىن بەرە جاتار... ال كينو ءوز كوڭىلىمنەن شىقتى. «فيلم «بيۋدجەتسىز» ءتۇسىرىلدى، جىگىتتەر ەنتۋزيازممەن جۇمىس ىستەدى. اكتەرلەر قۇرامىنا، سونداي-اق ءبىزدىڭ كوماندامىزعا قولداۋ كورسەتكەن بارلىق جانعا العىسىمدى بىلدىرەمىن»،- دەدى ءفيلمنىڭ رەجيسەرى شىڭعىس ابدىبەك.

ءتۇسىرىلىم جۇمىستارى الماتى قالاسىندا جانە شۋ وڭىرىندە ءوتتى.