الماتىدا قاڭتار وقيعاسىنا بايلانىستى ۇستالعان تاعى 9 ادام قاماۋدان بوساتىلدى. ولاردىڭ بۇلتارتپاس شاراسى قاماۋمەن بايلانىستى ەمەس شارا تۇرىمەن الماستىرىلدى. بۇل جونىندە وقيعا ورنىندا بولعان بەلسەندىلەر مەن "امانات" كوميسسياسىنىڭ وكىلدەرى حابارلادى دەپ جازدى ورتالىق ازيا جاڭالىقتار قىزمەتى.

9 ادامنىڭ جەتەۋى - تەرگەۋ يزولياتورىنان، ەكەۋى №4 قالالىق اۋرۋحانادان شىعارىلدى.

الەۋمەتتىك جەلىلەردە تاراعان ۆيدەولاردا تەرگەۋ يزولياتورىنان شىققان ادامداردىڭ اقساڭداپ، وزدىگىنەن جۇرە المايتىنى كورىنەدى. كەيبىرى بالداقپەن ءجۇر. شىققان كەزدە ولاردى تۋىستارى قارسى الدى.
"امانات" كوميسسياسىنىڭ اقپاراتىنشا، قاڭتار وقيعاسىنا بايلانىستى ۇستالعان مىنا ازاماتتاردىڭ بۇلتارتپاس شاراسى جۇمسارتىلعان: سۇندەت تۇرىكمەنباي، تالعات ماقاش، ۆلاديمير لوتوشكا، مەيىر كەنجەعۇلوۆ، مارات يحسانيەۆ، داستان يساەۆ، ءمايرامالى ەدەنوۆ، جاسۇلان امانگەلديەۆ، تالعات قايرات.

اقپاراتقا قاراعاندا، بۇلتارتپاس شاراسى ازاماتتاردىڭ دەنساۋلىعىنا بايلانىستى وزگەرتىلگەن.

وسىلايشا قاڭتار وقيعاسىنا بايلانىستى ۇستالىپ، كەيىن بۇلتارتپاس شاراسىنىڭ وزگەرۋىنە بايلانىستى قاماۋدان بوساتىلعاندار 25 ادامعا جەتتى. "امانات" كوميسسياسىنىڭ اقپاراتىنشا، الماتىنىڭ وزىندە عانا تەرگەۋ يزولياتوردا "جاپپاي تارتىپسىزدىك" ءىسى بويىنشا 250-280 ادام وتىر.

25 قاڭتاردا ادۆوكات ابزال قۇسپان باستاعان قوعامدىق كوميسسيا 11 ادامنىڭ بۇلتارتپاس شاراسى وزگەرگەنىن حابارلاعان.

بۇعان دەيىن قاڭتار وقيعاسىنا بايلانىستى ۇستالعانداردىڭ ازاپتالعانى، قارۋلى كۇشتەردىڭ وقيعا كەزىندە جارالاعانداردى دەنساۋلىعىنا قاراماستان اۋرۋحانادان الىپ كەتكەنى جونىندە حابار تاراعان. ارنايى جاساقتىڭ جارالانعانداردى اۋرۋحانادان ۇستاپ الىپ كەتكەنى تۋرالى ۆيدەو-ايعاقتى ازاتتىق تا جاريالاعان.

وسىعان دەيىن باس پروكۋراتۋرا قۇقىق قورعاۋ ورگاندارى تارابىنان ۇستاۋ جانە تەرگەۋ كەزىندە زاڭسىز ارەكەتتەر بولعانىن (ازاپتاۋ، بيلىك وكىلەتىن اسىرا پايدالانۋ جانە تاعى باسقا) مويىنداعان. رەسمي مالىمەت بويىنشا، ازاماتتاردان 109 شاعىم تۇسكەن. 11 شاعىم بويىنشا سوتقا دەيىنگى تەرگەپ-تەكسەرۋ امالدارى باستالعان.

رەسمي اقپاراتقا قاراعاندا قاڭتار وقيعاسى بويىنشا جالپى 2044 قىلمىستىق ءىس بار، 900-گە جۋىق كۇدىكتى ۇستالعان، 800-ىنەن استامى سوت سانكتسياسىمەن قامالعان.

قاڭتار وقيعاسى مەن وقيعادان كەيىنگى ازاپتاۋ مەن قىسىم كورسەتۋ فاكتىلەرىنە قۇقىق قورعاۋشىلار الاڭداعان.

ەۋروپارلامەنت جاقىندا قابىلداعان قارارىندا بەيبىت نارازىلىقتان كەيىن وربىگەن جاپپاي زومبىلىقتى ايىپتاپ، رەسمي نۇر-سۇلتاندى "تەرروريزم" ايىبىن وڭدى-سولدى تاقپاۋعا ۇندەگەن. 27 تارماقتان تۇراتىن قۇجاتتا قازاقستان بيلىگىن ازاماتتار مەن قوعامدىق ۇيىمداردى ساياسي سەبەپپەن قۋدامالاۋعا، ادامداردىڭ بەيبىت جينالۋىنا كەدەرگى كەلتىرمەۋگە، ءجون-جوسىقسىز ۇستاۋ مەن ازاپتاۋدى دوعارۋعا شاقىرعان.