ۋتيل الىمدارعا قاتىستى پەتيتسيا شىقتى. وعان ونلاين قول جيناۋ جالعاسىپ جاتىر.

پرەزيدەنت توقاەۆقا ارنالعان پەتيتسيادا «روپ وپەراتورى» جيناپ العان ميللياردتارىنىڭ ءاربىر تەڭگەسى ءۇشىن جاۋاپ بەرۋى كەرەكتىگى، جاڭا كولىكتەردىڭ حالىققا قولجەتىمدى بولۋى قاجەتتىگى ايتىلعان.

«قۇرمەتتى قاسىم-جومارت كەمەلۇلى!

2022 جىلدىڭ 11 قاڭتارىندا ءسىز «وپەراتور روپ» جشس-ن جابۋدى تاپسىردىڭىز.

ءبىز، قازاقستاننىڭ قاراپايىم اۆتوموبيلشىلەرى، ءسىزدىڭ شەشىمىڭىزدى تولىعىمەن قولدايمىز. ۋتيلدىك الىمداردى جەكە كومپانياعا وتكىزۋ باسىنان باستاپ قىلمىستىق ارەكەت بولعانى ءمالىم!

ءسىز مۇنى ايتقان بەتتە، جاعدايدى ءوز پايداسىنا اسىرۋعا تالپىنىپ جاتقان سان ءتۇرلى الىپ-ساتارلار مەن بلوگەرلەر بەلسەندىلىك تانىتا باستادى. بىراق ولار قاراپايىم حالىقتىن مۇددەسىن كوزدەپ وتىرعان جوق.

ءبىز ساياساتقا ارالاسپايمىز! قويعان تالاپتارىمىز وتە قاراپايىم!

بىرىنشىدەن، ۋتيلدىك الىمداردىن كولەمىن قايتا قاراستىرۋ. باسقا ەلدەردە، ءتىپتى ونەركاسىبى دامىعان كورشىلەس ەلدەردە دە ۋتيلدىك مولشەرلەمەلەردىڭ تومەن بولۋى دۇرىس ەمەس! ال ءبىز ادەتتەگىدەي بارىنەن كوپ تولەيمىز!

ەكىنشىدەن، جاڭا كولىكتەر قاراپايىم حالىق ءۇشىن قولجەتىمدى بولا ءتۇسۋى كەرەك. ادامدار تۇرمىس جاعدايى تومەن بولعاندىقتان، ءرولى وڭ جاعىندا ورنالاسقان «الفاردتاردى» رەسەيدە، ارمەنيادا جانە قىرعىزستاندا ساتىپ الىپ جاتىر. جاڭا كولىكتەردى العىسى كەلەتىن قاراپايىم حالىققا، ەڭ بولماعاندا جاقىندا وتاۋ قۇرعان جاس جانە كوپبالالى وتباسىلارعا نەگە جەڭىلدىك جاساماسقا؟ ەسكى كولىكتى وتكىزگەنى ءۇشىن قوماقتى تولەمدەر جاساۋ مۇمكىندىگى جوق پا؟

ۇشىنشىدەن، «وپەراتور روپ-تى» قاتاڭ تۇردە مەملەكەتكە قايتارۋ قاجەت. ونى بارلىق جەڭىلدىكتەردەن ايىرۋ كەرەك. ول ءۇشىن ارنايى ويلاپ تابىلعان ۋتيلدىك الىمدى «اينالدىرۋ» سحەماسى جويىلۋى كەرەك. «روپ وپەراتورى» جيناپ العان ميللياردتارىنىڭ ءاربىر تەڭگەسى ءۇشىن جاۋاپ بەرۋى كەرەك! «روپ وپەراتورىنىڭ» قانشا قاراجاتتى وزىنە العانىن بۇكپەسىز كورسەتۋ كەرەك! ال ۋتيلدىك الىم اشىق بولۋى كەرەك. حالىق بارلىق اقشانىڭ قايدا كەتىپ جاتقانىنان حاباردار بولۋى كەرەك.

تورتىنشىدەن، جاڭا مەملەكەتتىك وپەراتور ءوزىنىڭ تىكەلەي جۇمىسىمەن اينالىسۋى كەرەك – ەل جولدارىن ەسكىرگەن كولىكتەردەن تازارتۋ! وڭىرلەر قيراۋدىڭ ءسال-اق الدىندا تۇرعان، اۋانى لاستايتىن كولىكتەرگە تولى. ولار تەحنيكالىق تەكسەرۋدەن قالاي وتەدى؟ مۇنداي كولىك جولداردا جۇرمەۋى ءتيىس!
ءبىزدىڭ جانايقايىمىز سىزگە دەيىن جەتەدى دەگەن ۇمىتتەمىز»،-دەلىنگەن پەتيتسيادا.

ۋتيل الىممەن اينالىسقان كومپانيانىڭ ن.نازارباەۆتىڭ كىشى قىزى ءاليا نازارباەۆامەن تيەسىلى ەكەنى ءمالىم بولعان.

ەلدەگى قاڭتار وقيعاسىنان كەيىن پرەزيدەنت توقاەۆ ۋتيل الىممەن اينالىساتىن كومپانيا ماسەلەسىن شەشۋدى، ازاماتتاردىڭ تالابىن ەسكەرۋدى ايتقان ەدى.