كابۋلدە جۇرگەن ءتالىپ سودىرلارى. فوتو: dw.com

تالىپتەر اقش پەن ناتو-عا جاردەمدەسكەن اۋعانستان ادامدارىن ىزدەۋگە بەلسەنە كىرىستى. بىرىككەن ۇلتتار ۇيىمىنىڭ مالىمەتىن ۆۆس مەن New York Times جاريالادى.

بۇل اقپاراتقا قاراعاندا، تالىپتەر قولىندا امەريكالىقتارمەن جۇمىس ىستەسكەن ادامداردىڭ ءتىزىمى بار، ولار سول تىزىمدەگى ادامداردى تاۋىپ، جازاعا تارتقىسى كەلەدى. ەگەر ادامنىڭ ءوزى تابىلماسا، ونىڭ تۋىسىن قاماۋعا الامىز، بولماسا ولتىرەمىز دەپ قورقىتادى. اسىرەسە، بيلىكتەن تايدىرىلعان ۇكىمەتتىڭ اسكەري قىزمەتكەرلەرى مەن تەرگەۋ ورگاندارىندا جۇمىس ىستەگەن پوليتسەيلەرگە قاۋىپ كۇشتى. قازىر اۋعانستاننان كەتىپ قالۋ ءۇشىن كابۋل اۋەجايىنا ۇمتىلعان ادامداردىڭ كوبى سول تىزىمدە تۇر.

تالىپتەر جۋرناليستەردى دە ىزدەستىرىپ جاتىر. ولار اۋعانستاننىڭ باتىسىندا Deutsche Welle باسىلىمى ءجۋرناليسىنىڭ ءبىر تۋىسىن ءولتىرىپ، ەكىنشىسىن اۋىر جارالاعان. بۇل جونىندە گەرمانيانىڭ مەديكومپانياسى حابارلادى. بۇل اقپاراتقا قاراعاندا، تالىپتەر گەرمانياعا كەتىپ قالعان ءجۋرناليستى ىزدەپ بارعان. ونىڭ وزگە تۋىستارى سوڭعى ساتتە قاشىپ ۇلگەرىپ، جاسىرىنىپ قالعان.

DW مالىمەتىنشە، كابۋل مەن پروۆينتسيالاردا تالىپتەر وسى كومپانيانىڭ كەمى ءۇش قىزمەتكەرىنىڭ ءۇيىن تىنتىگەن. گەرمانيا بۇقارالىق اقپارات قۇرالدارى ۇكىمەتكە اشىق حات جازىپ، اۋعانستاندا نەمىس باسىلىمىنا جۇمىس ىستەگەن جۋرناليستەردى وتباسىلارىمەن قوسا دەرەۋ اكەتەتىن باعدارلاما جاساۋعا شاقىردى.

Facebook اۋعانستانداعى پايدالانۋشىلارىن "دوستاردى قاراۋ" فۋنكتسياسىنان اجىراتتى. الەۋمەتتىك جەلىدەگى كيبەرقاۋىپسىزدىك ءبولىمىنىڭ باسشىسى ناتانيەل گلەيحەر Twitter ارقىلى مۇنىڭ "ادامداردى قۋعىن-سۇرگىننەن قورعاۋ ءۇشىن" جاسالعانىن ايتتى.

"تاليبان" قوزعالىسى 15 تامىزدا كابۋلدى سوعىسسىز العان سوڭ، اۋعانستاننىڭ بۇكىل اۋماعىنا باقىلاۋ ورناتقانىن، اۋعانستان يسلام امىرلىگىن قۇراتىنىن مالىمدەگەن.

"تاليبان" 1996 جىلدان 2001 جىلعا دەيىن اۋعانستاننىڭ باسىم بولىگىندە بيلىك ەتكەن. 2001 جىلى نيۋ-يوركتەگى تەرروردان سوڭ اقش پەن ونىڭ وداقتاستارى اۋعانستان اۋماعىنا كىرىپ، تالىپتەر بۇرىنعى بيلىگىنەن ايىرىلعان ەدى. ولار اقش اسكەرى اۋعانستاننان شىعارىلار قارساڭدا قايتا بەلسەنىپ، ءىرى قالالاردى شاپشاڭ باسىپ العان.

The Qazaq Times