اقش پەن جاپونيانىڭ سىرتقى ىستەر جانە قورعانىس مينيسترلەرى توكيودا «2+2» كەزدەسۋىن وتكىزىپ، تايۋان (تايۆان) بۇعازى ماسەلەسىن اشىق تالقىعا سالدى. تاراپتاردىڭ بىرلەسكەن مالىمدەمەسىندە «تايۋان بۇعازىنىڭ قاۋىپسىزدىگى مەن تۇراقتىلىعى» اتاپ ءوتىلدى.

كەشە، 16 ناۋرىز كۇنى جاپونيانىڭ سىرتقى ىستەر ءۋازىرى توشيميتسۋ موتەگي مەن قورعانىس ءۋازىرى نوبۋو كيشي اقش-تىڭ مەم. حاتشىسى بلينكەن مەن قورعانىس ءمينيسترى وستين اراسىنداعى بىرنەشە كەلىسسوزدەردەن كەيىن ەكى تاراپتىڭ كونسەنسۋسىن جاريالاۋ ءۇشىن بىرلەسكەن ءباسپاسوز ءماسليحاتىن وتكىزدى. باق وكىلدەرىنە جاساعان مالىمدەمەدە، قىتايتايدىڭ قازىرگى مىنەز-قۇلقى حالىقارالىق تارتىپكە سايكەس كەلمەيتىنى، بۇل اقش-جاپون وداعىنا، سونداي-اق حالىقارالىق قاۋىمداستىق ءۇشىن قيىندىق الىپ كەلەتىنى اتاپ ءوتىلدى.

جاپون سىرتقى ىستەر ءۋازىرى موتەگي ءوز مالىمدەمەسىندە ەكى ەل اراسىندا قورعانىس-قاۋىپسىزدىك ىنتىماقتاستىقتى ساقتاۋ دامىتۋ كەلىسىمدەرىنەن تىس، سەنكاكۋ ارالدارىنىڭ يەلىك قۇقىعى مەن قورعالۋىنا قاتىستى دا بەرىك ۇستانىمعا كەلگەنىن، بۇدان كەيىن بۇل ارالداعى باعىتتالعان كەز-كەلگەن بىرجاقتى ارەكەتتەر جاۋاپسىز قالمايتىنىن ءبىلدىردى.

بايدەننىڭ باس ديپلوماتى بلينكەن دە ونىڭ ءسوزىن قوستاپ: «بۇدان كەيىن امەريكا قۇراما شتاتتارى مەن جاپونيا ءبىر-ءبىرىنىڭ دەموكراتيا، ادام قۇقىعى جانە زاڭنىڭ ۇستەمدىگى سالاسىنداعى ورتاق قۇندىلىقتارىن بىرلەسە قورعايتىن بولادى»، – دەدى. بلينكەن سونداي-اق بۇل ورتاق شارالار قىتايدىڭ دەموكراتيا مەن ادام قۇقىتارىنا جات ارەكەتتەرىنە قارسى شارالاردى دا ءوز ىشىنە قامتيتىنىن اتاپ ءوتتى. ول سوزىندە: «قىتاي گونكونگ اۆتونومياسىن جۇيەلى تۇردە جويۋ ءۇشىن ماجبۇرلەۋ مەن اگرەسسيۆتى ارەكەتتەردى قولدانادى، تايۋان دەموكراتياسىن السىرەتۋگە تىرىسىپ، شىڭجاڭ مەن تيبەتتە ادام قۇقىعىن بۇزۋدا جانە وڭتۇستىك قىتاي تەڭىزىندە حالىقارالىق قۇقىقتى، ەگەمەندىك تالاپتارىن بۇزىپ وتىر»، – دەپ مالىمدەدى.

“The Qazaq Times”