بايدەن & ماكرون.

قۇراما شتات بيلىگىن جاقىندا عانا قولىنا العان جوزەف بايدەن فرانتسۋز ارىپتەسى ەممانۋەل ماكرونمەن تەلەفون ارقىلى سويلەستى. ەكى ەل ليدەرى ىنتىماقتاستىقتى دامىتۋعا كەلىستى.

فرانتسيا پرەزيدەنتى بايدەن اق ءۇي تىزگىنىن قولىنا ۇستاعاننان كەيىن تەلەفون ارقىلى سويلەسكەن العاشقى شەتەلدىك ارىپتەستەرىنىڭ ءبىرى. بۇدان بۇرىن ول بريتان جانە كانادا ۇكىمەتىنىڭ جەتەكشىلەرىمەن سويلەسكەن.

اق ءۇي ءباسپاسوز قىزمەتىنىڭ اقپارات قۇرالدارىنا تاراتقان مالىمەتىنە قاراعاندا، تەلەفون ارقىلى سويلەسۋدە بايدەن قۇراما شتاتتاردىڭ «ەڭ كونە وداقتاسى» فرانتسيامەن جان-جاقتى كەلىسىمدى ءداستۇرلى تۇردە دامىتۋعا تىرىساتىنىن جەتكىزگەن.

فرانتسيا پرەزيدەنتى ماكرون دا قۇراما شتاتتارمەن بۇعان دەيىن تۇزىلگەن بارلىق كەلىسىمدەردى دامىتىپ، وعان قوسا اقش-تىڭ ەو مەن ناتو قۇرامىنداعى ارەكەتتەرىنە قولداۋ كورسەتۋگە دايىن ەكەنىن جەتكىزگەن.

بايدەن مەن ماكرون اراسىنداعى سويلەسۋدە ەكى ەل قاتىناستارىنان تىس كليماتتىڭ وزگەرۋى، جاھاندىق ەكونوميكانى دامىتۋ، پاندەمياعا قارسى ارەكەت ەتۋ ماسەلەلەرى دە ءسوز بولعان.

ايتا كەتەيىك، بايدەن بيلىگى اقش-تىڭ الىستاي تۇسكەن وداقتاستارىمەن قارىم-قاتىناسىن رەتتەپ، حالىقارالىق كەلىسىمدەرگە قايتا قوسىلماق. ونىڭ اراسىندا «پاريج كەلىسىمى» دە بار.

“The Qazaq Times”