ءازىربايجان شۋشانى قايتارىپ الدى: بەيبىت كەلىسىمنىڭ مۇمكىندىگى ازايدى

«ارمەنيانىڭ قازىرگى پرەمەر-ءمينيسترىنىڭ تۇسىندا ءبىزدىڭ بەيبىت كەلىسىمگە كەلۋىمىز جوققا ءتان»، – دەدى يليحام اليەۆ BBC-گە بەرگەن سۇحباتىندا. ءازىربايجان باسشىسى ارمەنيانىڭ اسكەري كۇشتەرى تاۋلى قاراباقتان شىعىپ كەتكەندە عانا اسكەري ارەكەتتەردى توقتاتاتىنىن قايتالادى.

جەكسەنبى كۇنى باكۋ تارابى تاۋلى قاراباقتىڭ ورتالىعى سانالىپ كەلگەن جانە ستراتەگيالىق جاقتان اسا ماڭىزدى شۋشا قالاسىن ءوز باقىلاۋىنا العانىن مالىمدەدى. پرەزيدەنت اليەۆ الەۋمەتتىك جەلىدەگى پاراقشاسىندا شۋشاداعى جەڭىستى اكەسى گەيدار اليەۆكە باعىشتاعانىن جازدى.

ونىڭ ايتۋىنشا تاۋلى قاراباق ماسەلەسى بويىنشا بەيبىت كەلىسىمگە كەلۋدىڭ مۇمكىندىگى بارعان سايىن ازايىپ بارا جاتىر، سەبەبى ءازىربايجان تاريحي تەرريتورياسىن قايتارىپ الۋ ءۇشىن كوپ كۇش جۇمساۋدا.

ارمەنيا تارابى شۋشادان ايرىلعانىن راستاعان جوق، دەگەنمەن شۋشا قالاسى ءۇشىن تالاس ۇرىستار بولىپ جاتقانىن ءبىلدىردى. بىراق، ءازىربايجاننىڭ قورقانىس مينيسترلىگى شاھاردى تولىعىمەن يەلەگەندەرىن، ارمەنيا جاقتىڭ اقپاراتتى بۇرمالاپ جاتقانىن ايتتى.

شۋشا قالاسىن ءازىربايجان يەلەسە وندا ەشكىم مويىنداماعان اۆتونوميانىڭ ورتالىعى ستەپاناكەرت تە انە-مىنە ءازىربايجان قولىنا وتەدى دەي بەرىڭىز. سەبەبى، ستراتەگيالىق اسا ماڭىزدى بۇل قالا تاۋلى قاراباقتىڭ سيمۆولى. 1992 جىلعى سوعىستادا شۋشا سوعىستىڭ بۇرىلىسى قاتارىندا باعالانعان.

شۋشانىڭ «ءازىر» اعايىندارعا قاراعانى تۋرالى جاڭالىقپەن قاتار، تاعى ءبىر ماڭىزدى وقيعا بولدى. تاپ وسى تۇستا تۇركيا ءسىم باسشىسى مەۆليۋت شاۆۋشوعلۋ مەن قورعانىس ءمينيسترى حۋلۋسي باكۋگە بارعان. پرەزيلەن اليەۆ پەن تۇركيالىق دەلەگاتسيا ۇزاق كەڭەس وتكىزگەن.

“The Qazaq Times”