"نامىس" قوزعالىسى جاستارى اقش كونسۋلىنا نارازىلىق حاتىن تاپسىردى.

«بورات-2» فيلمىنە قارسى ۇلتجاندى ازاماتتار اقش كونسۋلدىعىنا پەتيتسيا تاپسىردى.

بۇگىن، 23 قازان جۇما كۇنى الماتىداعى اقش كونسۋلدىعىنىڭ الدىنا ءبىر توپ بەلسەندى جانە ۇلتجاندى ازاماتتار جينالىپ، اقش-تىڭ الماتىداعى باس كونسۋلى ەريك مايەر مىرزاعا نارازىلىق حاتىن تاپسىردى.

پەتيتسيادا بىلاي دەلىنگەن:

«قۇرمەتتى كونسۋل مىرزا! قازاقتىڭ نامىسشىل پاتريود جاستارى قازاق ۇلتىن ماسقارالاپ، ەلىمىزدىڭ ابرويىن ءتۇسىرىپ، تاريحىمىزعا، مادەنيەتىمىزگە وراسان زور نۇقسان كەلتىرىپ وتىرعان ساشا بارون كوەننىڭ «بورات-2» ءفيلمىنىڭ كورسەتىلىمگە شىعۋىنا تۇبەگەيلى قارسى ەكەنىن جەتكىزەدى. سايقىمازاق تۇسىرگەن اتالمىش فيلم اقش-تىڭ amazon.com پلاتفورماسى ارقىلى كوپشىلىك حالىققا تاراپ كورسەتىلۋدە، سول سەبەپتى ەگەمەن ەلدىڭ نامىسشىل جاستارى رەتىندە اقش-تىڭ ەلشىلىگى تاراپىنان قاتاڭ شارا قولدانىپ، اكتەردىڭ جانە بارلىق ۇيىمداستىرۋشىلاردىڭ قازاق حالقىنان كەشىرىم سۇراۋىن تالاپ ەتىمىز. سونىمەن قاتار، تاۋەلسىز قازاق ەلىنىڭ بايراعىن جەرگە تاپتاعانى جانە ۇلت قاۋىپسىزدىگىنە كەلتىرگەن زيانى ءۇشىن زاڭ جۇزىندە ناقتى شارالار قولدانىلۋىن تالاپ ەتەمىز. ءبىز قازاق جاستارى ۇلتىمىزدى قورلاۋعا، ءتىل تيگىزۋگە جول بەرمەيمىز!».

نارازىلىق حاتىن «نامىس» قوزعالىسىنىڭ وكىلدەرى ازامات عالىمجان جانە ماقسات مامادياروۆ قاتارلى ازاماتتار اپارىپ تاپسىرعان. ولاردىڭ رەداكتسياعا بەرگەن مالىمەتىنە قاراعاندا، كونسۋلدىق تاراپىنان انون ەسىمدى وكىلى كەزدەسىپ، نارازىلىق حاتىن قابىلداپ العان. سونداي-اق، قازاقستاندىقتاردىڭ نارازىلىعىنان حاباردار ەكەنىن، الداعى ۋاقىتتا نارازىلىق حاتىندا قويىلعان تالاپتار بويىنشا جۇمىس جۇرگىزۋگە ءسوز بەرگەن.

“The Qazaq Times”