اقش پەن قىتايدىڭ قارىم-قاتىناسى شيەلەنىسىپ تۇرعان تۇستا، مەملەكەتتىك حاتشى مايك پومپەو وڭتۇستىك ازيا ەلدەرىنە ساپارلاماق. پومپەو 25-30 قازان كۇندەرى ۇندىستانعا، شري-لانكاعا، مالديۆ ارالدارى مەن يندونەزياعا بارۋدى جوسپارلاپ وتىر.

بۇل ساپاردى ءۇندى-تىنىق مۇحيتى ايماعىنداعى قىتايدىڭ گەوساياسي جانە ەكونوميكالىق سىن-قاتەرلەرىنە قارسى ءىس-قيمىلدار دەپ تۇسىنگەن ءجون. «مەن ساپاردىڭ ءار ايالداماسىندا ەكىجاقتى ماسەلەلەردىڭ كەڭەڭتىلگەن دەڭگەيدە تالقىلايتىن بولامىن، سونداي-اق، ءۇندى-تىنىق مۇحيتى ايماعىنىڭ ەركىندىگى مەن اشىقتىعىن ساقتاۋ بويىنشا ىنتىماقتاستىقتى قامتاماسىز ەتۋدىڭ ەڭ جاقسى جولىن ىزدەۋ ءۇشىن وسى ەلدەرمەن جۇمىس ىستەيتىن بولامىن»، – دەگەن پومپەو.

اقش مەملەكەتتىك حاتشىسى ءبىر كۇن بۇرىن جاساعان مالىمدەمەسىندە وڭتۇستىك ازيا ساپارىنىڭ ماقساتى تۋرالى كەڭىرەك توقتالدى. ول قكپ-نىڭ كۇن ساناپ ارتىپ كەلە جاتقان ىقپال-قاتەرلەرىنە قارسى ءۇندى-تىنىق مۇحيتى ايماعىنداعى ەركىن ەلدەردى قۇراما شتاتتار جاعىندا كۇرەسۋگە شاقىراتىنىن جەتكىزگەن.

انىعىندا، پومپەو وڭتۇستىك ازيا ساپارىن بۇدان ءبىر اي بۇرىن جاساۋى كەرەك ەدى. جوسپارلى ساپار ترامپتىڭ كوروناۆيرۋس جۇقتىرىپ العانىنا بايلانىستى كەرى شەگەرىلگەن بولاتىن. بۇل ساپارداعى ەڭ ماڭىزدى ايالداما – ءۇندىستان. ءۇندىستان سىرتقى ىستەر جانە قورعانىس مينيسترلەرىمەن كەزدەسىپ اقش-ءۇندىستان اراسىنداعى ستراتەگيالىق ارىپتەستىكتى تەرەڭدەتە تۇسپەك.

قازىرگى تاڭدا قىتاي مەن ءۇندىستان اراسىندا قايشىلىق كۇشەيىپ تۇر. قىتايدا باستاپ تاراعان ىندەت ۇندىستاندىقتاردى اۋىر شىعىنعا باتىردى جانە قىتايعا دەگەن اشۋ-ىزانى ءورشىتتى. وعان قوسا شەكارا جانجالى قىتايعا دەگەن ەكونوميكالىق، ساياسي، اسكەري قارسىلىقتى ودان ارمەن ۇلعايتتى. بۇل تۇستا قۇراما شتاتتار قىتايعا قارسى ءۇندىستاندى دەر كەزىندە ءوز وداعىنا تارتۋعا كۇش سالىپ وتىر.

“The Qazaq Times”