قىزمەت وكىلەتتىگىن اسىرا پايدالانىپ ءىستى بولعان پاۆلودار وبلىسىنىڭ ەكس-اكىمى بولات باقاۋوۆ سوت شەشىمى بويىنشا ەڭبەككە تارتىلمايتىن بولدى. سەبەبى...

«يربيس TV» تەلەارناسىنىڭ حابارلاۋىنشا, ناعاشىلىق راقىمىن تانىتامىن دەپ ءۇش جارىم جىلعا باس بوستاندىعى شەكتەلگەن بۇرىنعى اكىم قوعامدىق جۇمىسقا جەگىلمەيدى. ءوزىنىڭ سۋرەتىن ميلليوندارعا ساۋدالاعان اۋكتسيون كەشى مەن ۇستالدى-ۇستالمادى دەگەن الاگەۋىم اقپاردىڭ دۇرمەگىنەن اتىشۋلى شەنەۋنىككە اينالعان اكىم بيىل شارتتى مەرزىمگە سوتتالعان ەدى. ۇكىم بويىنشا «شەنىن اسىرا پايدالانعان» شەنەۋنىك جىل سايىن 100 ساعات جۇمىس ىستەۋى كەرەك. ايماقتىق اقپارات قۇرالىنىڭ دەرەگىنە قاراعاندا، باقاۋوۆ وزىنە لايىقتى جۇمىسقا ورنالاسقان.

«سوتتالعان ازامات بەكىتىلگەن مەكەن-جايى بويىنشا پاۆلودار قالاسىنىڭ پروباتسيا قىزمەتىندە ەسەپتە تۇر. زاڭناماعا سايكەس، جۇمىسقا ورنالاسپاعان سوتتالعاندار ءماجبۇرلى ەڭبەككە تارتىلادى. الايدا بۇل ازامات جۇمىسپەن قامتىلعان. ءماجبۇرلى ەڭبەككە تارتىلمايدى. جەكە ىسىنەن اقپاراتتى جاريالاۋعا بولمايدى»، – دەگەن پاۆلودار وبلىسى قاج دەپارتامەنتىنىڭ ءباسپاسوز حاتشىسى گۇلجان ابدۋعاليەۆا وڭىرلىك ارناعا بەرگەن پىكىرىندە.

بۇعان دەيىن 16 قاڭتاردا ۇستالعان بولات باقاۋوۆقا قىلمىستىق كودەكستىڭ 362-بابى 4-ءشى بولىگى ءۇشىنشى پۋنكتى بويىنشا قىلمىس جاسادى ايىپ تاعىلعان. ناتيجەسىندە باقاۋوۆ بوستاندىقتا قالدى، بىراق ءۇش جارىم جىلعا باس بوستاندىعى شەكتەلىپ، 100 ساعات قوعامدىق جۇمىستاردى اتقارۋى ءتيىس ەدى.

اشىق دەرەككوزدەگى مالىمەتتەرگە سەنسەك، بولات باقاۋوۆ كىناسىن تولىق مويىنداعاننان كەيىن پروكۋرورمەن كەلىسىمگە كەلگەن. ىستەگى دەرەككە سايكەس، باقاۋوۆتىڭ جيەنىنە تيەسىلى فيرما 200 ميلليون تەڭگە سالىق تولەمەگەن. اكىم سالىقشىلاردان بۇل سومانى 40 ەسە ازايتۋدى تالاپ ەتكەن. ءبىر اپاتادان كەيىن قوعامدىق رەزونانس تۋدىرعان ىسكە بايلانىستى پرەزيدەنت توقاەۆ «اتىشۋلى اكىم» باقاۋوۆتى قىزمەتىنەن بوساتقان. ازاماتتىق قوعامدا شەنەۋنىكتەردىڭ جەمقورلىق، قىزمەتىن اسىرا پايدالانۋ ايىپتارىمەن سوتتالا تۇرا كوپ وتپەي ءارتۇرلى قۇقىقتىق اكتىلەردىڭ كومەگىمەن بوساپ شىعۋىنا نارازىلىق ازا ەمەس. «سولقىلداق زاڭ سوتتالعان شەنەۋنىكتەردىڭ قولايىنا جاعادى» دەيدى بەلسەندىلەر.

"The Qazaq Times"