اقش بيلىگى حيۋستونداعى قىتاي ەلشىلىگىن جابۋدى تالاپ ەتتى جانە بۇل ءۇشىن 72 ساعات ۋاقىت بەردى. وسىنىڭ الدىندا عانا اقش قىتايلىق حاكەرلەر كوروناۆيرۋسقا قارسى ۆاكتسينا تۋرالى مالىمەتتەردى ۇرلاماق بولدى دەپ ايىپتاعان ەدى.

امەريكا بيلىگىنىڭ ايتۋىنشا قىتايلىق ەكى ازامات عىلىمي زەرتتەۋ ورتالىقتارىنىڭ مالىمەتتەرىنە حاكەرلىك شابۋىل جاساعان. ولار قىتاي بيلىگىنىڭ قولداۋىنا سۇيەنگەن دەگەن دە مالىمەت ۇسىندى.

قىتاي تارابى ءوز كەزەگىندە اقش-تىڭ بۇل قادامىن قاتاڭ ايىپتادى. قىتاي ءسىم مالىمدەمەشىسى اقش-تىڭ كونسۋلدىقتى جابۋ تالابى ورىنسىز دەپ ءبىلدىردى. الايدا، اقش مەملەكەتتىك دەپارتامەنتى بۇل قادام "امەريكالىق مەنشىك قۇقىعىن قورعاۋ ماقساتىندا" جاسالىپ جاتقانىن العا تارتتى.

72 ساعات ىشىندە جابىلۋعا ءتيىس قىتاي كونسۋلدىعى عيماراتىندا ءتۇتىن بۋداقتاعان. امەريكالىق باسىلىمدار قىتاي كونسۋلدىعى ماڭىزدى قۇجاتتاردى ورتەپ جاتقانىن جازدى. عيماراتتان شىققان ءتۇتىن الىستان كورىنىپ تۇرعان. ءتىپتى، ءورت ءسوندىرۋ جەدەل قىزمەتى دە عيمارات الدىنا كەلگەن. بىراق، قىتاي ەلشىلىگى ولاردىڭ عيماراتقا كىرۋىنە رۇقسات بەرمەگەن.

سوڭعى بىرنەشە اپتادا، پومپەو باستاپ قىتاي ۇكىمەتىنە ساياسي قىسىمدى ارتتىرىپ جاتىر. ول باتىس ەلدەرىنىڭ قىتايعا قارسى كواليتسيا قۇرۋى تۋرالى دا اشىق ايتىپ كەلەدى.

"The Qazaq Times"