اقش پەن قىتاي قايشىلىعى ەڭ ءتۇبىرلى ماسەلەلەرگە قاراي اۋنادى. ەكى جىلدان بەرى ساۋدا قاقتىعىسى شەشىم تاۋىپ ۇلگىرمەستەن، جاڭا كوروناۆيرۋس ىندەتىنىڭ شىعۋى مەن ۋحاندا تارالا باستاعان قاۋىپتى ىندەتكە قىتاي بيلىگىنىڭ رەاكتسياسى قايشىلىقتى تەرەڭدەتتى. بۇعان گونكونگ پەن وڭتۇستىك قىتاي تەڭىزىندەگى قىتاي اگرەسسياسى قوسىلىپ، بەيجىڭنىڭ قادامدارى اقش-تىڭ ۇستانىمدارىنا قايشى بولا ءتۇستى. ءدال وسى تۇستا اقش ۇلىبريتانيانى قىتايعا قارسى كۇرەسكە باستاپ شىقتى.

دۇيسەنبىدە اقش مەم. حاتشىسى مايكل پومپەو لوندونعا رەسمي ساپارمەن باردى. ال، كەشە بريتانيانىڭ باس ءۋازىرى (پرەمەر-ءمينيسترى) بوريس جونسونمەن كۇن ۇزاق كەڭەستە بولدى. كەزدەسۋدەن بەلگىلى بولعانداي اقش پەن بريتانيانىڭ قىتايعا قارسى قادامدارى ۇيلەسە ءتۇستى. ەندى تاراپتار قىتايدىڭ Huawei كومپانياسىنىڭ ونىمدەرىن پايدالانۋدى شەكتەپ، گونكونگ ماسەلەسىندەگى ۇستانىمدارىڭ ءبىر ەسە قاتاڭداتا تۇسپەك.

انىعىندا پومپەونىڭ كەزەكتى لوندون ساپارى تاريحي وقيعا دەسە دە بولادى. بۇل ءوسىپ كەلە جاتقان قىتاي ىقپالىنا قارسى اعىلشىن الەمىنىڭ (بريتانيا، اقش، كانادا، اۋستراليا جانە ۇلىبريتانياعا قاراستى شاعىن ەلدەر) اشىق قارسىلىققا قادام باسقانىن كورسەتتى.

ءتىپتى پومپەو كەزدەسۋدەن كەيىنگى ءباسپاسوز جيىنىندا قىتاي قاۋپىنە قارسى وداق قۇرۋ جوسپارلارىنىڭ بار ەكەنىن دە اڭعارتتى. ء"بىز قكپ-نىڭ كۇش جىگەرىنە قارسى بارلىق ەلدەر بىرلەسە كۇرەسەدى دەپ ۇمىتتەنەمىز. بۇل ۇلىبريتانيادان باسقا ەلدەردى دە قامتيدى. ءبىز بۇل قاۋىپى سەزىنەتىن ەلدەرمەن جاڭا وداق قۇرامىز دەپ ۇمىتتەنەمىز", – دەدى پومپەو.

ساراپشىلار مەن باتىستىق ديپلوماتتاردىڭ پايىمداۋىنشا، بۇل رەت ۋاشينگتون مەن لوندون قىتاي بيلىگىنەن كەلەتىن قاۋىپتەرگە قارسى ەل بىلمەيتىن كوپتەگەن كەلىسىمگە كەلدى. ساپارىنان بۇرىن پومپەو كەزەكتى كەزدەسۋدىڭ ماڭىزدىلىعىن تالاي رەت قايتالاپ ايتقان. بىلايشا ايتقاندا پومپەو بۇل كەزدەسۋدى اسىعا كۇتتى.

ايتپاقشى، بريتان باس ۋازىرىمەن كەزدەسۋدە پومپەو الەۋمەتتىك ارا قاشىقتىقتى ساقتادى. بىراق، جۋرناليستەرگە: "الەۋمەتتىك ارا قاشىقتىق ساياسي نەمەسە ديپلوماتيالىق ارا قاشىقتىقتى بىلدىرمەيدى", – دەپ استارلى ازىلدەدى.

ساراپشىلار پلمپەو كەزدەسۋدە بريتان بيلىگىنەن قىتايعا تولىق قارسىلىقتى ءۇمىت ەتەدى دەپ قارايدى. بۇعان دەيىن بريتان بيلىگى اقش پەن قىتاي اراسىندا تەپە-تەڭدىكتى ۇستانۋعا تىرىسىپ كەلگەن. بىراق، Huawei كومپانياسىنىڭ ۇلتتىق قاۋىپسىزدىككە توندىرەتىن قاتەرىنە كەلگەندە بۇل تەڭدىك بۇزىلدى، وعان ۇلىبريتانيانىڭ بۇرىنعى كولونياسى سانالاتىن گونكونگقا دەگەن بەيجىڭنىڭ قاتال ۇستانىمى قوسىلىپ، لوندون مەن بەيجىڭ اراسى مۇلدە الشاقتاپ كەتتى.

پومپەو لوندونعا بار سالىسىمەن قىتايدىڭ بريتانياداعى ەلشىسى شىجاق قاعىپ، Twitter-دە مالىمدەمە جاسادى. ول مالىمدەمەسىندە: ء"بىز قىتاي-بريتان قاتىناسىنان قىتاي مەن اقش قايشىلىعىن كورۋدى قالامايمىز", – دەدى. الايدا، پومپەو مەن جونسون كەزدەسۋىنەن كەيىن قىتاي ەلشىسىنىڭ بۇل ءۇمىتى اقتالماي قالعانى انىق بولدى.

"The Qazaq Times"