پومپوە لوندونعا ساپارلاي باردى. فوتو: VOA

اقش مەملەكەتتىك حاتشىسى مايك پومپەو ءبىر كۇن بۇرىن لوندونعا رەسمي ساپارمەن باردى. پومپەو ساپارىنىڭ باستى ماقساتى كۇن سايىن ارتا تۇسكەن قىتايدىڭ اگرەسسيۆتى ىقپالىنا قارسى بىرلەسە كۇرەس جۇرگىزۋدى بريتان ۇكىمەتىمەن اقىلداسپاق. كەزەكتى ساپارىندا ول بريتان باس ءۋازىرى بوريس جونسون جانە وزگە دە بىرقاتار ماڭىزدى لاۋازىمدارمەن كەزدەسپەك.

پومپەو كەزەكتى ساپارىندا قىتاي كوممۋنيستىك پارتياسى جانە ونىڭ كۇللى الەمگە توندىرگەن قاتەرىنە قارسى كۇرەسۋدى اعىلشىن ارىپتەستەرىمەن كەڭەستەتىنىن بۇعان دەيىن دە ايتىپ كەلگەن بولاتىن. ول لوندونعا جەتۋدەن بىرنەشە ساعات بۇرىن عانا، بريتان پرەمەرى جونسون گونكونگقا قاتىستى ماڭىزدى بىرنەشە كەلىسىمدى شۇعىل تۇردە كۇشىنەن قالدىرعانىن مالىمدەگەن. ءارى، بۇل قادامدى قىتايدىڭ 30 ماۋسىمدا حالىقارالىق قاۋىمداستىقتىڭ نارازىلىعىنا قاراماستان گونكونگقا «ۇلتتىق قاۋىپسىزدىك تۋرالى جاڭا زاڭدى» ەنگىزگەنىنە جاۋاپ رەتىندە جاساعانىن ايتقان.

ۇلىبريتانيانىڭ سوڭعى شەشىمى اعىلشىن ەلىندەگى بيلىك ​​جانە وپپوزيتسيالىق پارتيالار دەرلىك بەيجىڭنىڭ الەمدىك ارەنادا ءوسىپ كەلە جاتقان اگرەسسيۆتى مىنەز-قۇلقىنا الاڭداۋشىلىق ءبىلدىرىپ وتىرعانىن كورسەتەدى.

بىلتىردان بەرى الەمدىك ساياسي ارەنادا ماڭىزدى تاقىرىپتاردىڭ ءبىرى بولعان گونكونگ ماسەلەسى اقىرىندا اعىلشىن مەن قىتاي قاتىناسىنا سىزات سالدى. بىلتىر ماۋسىمدا باستالعان گونكونگتاعى نارازىلىق بەيجىڭ جاعىنان مۇلدە كەرى باعىتتا شەشىلدى. بەيجىڭ بيلىگى ەل نارازىلىعىن قايىرىپ قويىپ، كەرىسىنشە گونكونگتى كۇشتەپ باسقاراتىن زاڭداردى ەنگىزدى. بۇل ۋاشينگتون مەن لوندوننىڭ ۇستانىمدارىندا كوزگە ىلمەۋمەن بىردەي بولدى.

مىنە وسى قايشىلىق قابىنىپ بارا جاتقاندا، ۋحاندا باستاپ تاراعان ىندەت كۇللى الەمدىك داعدارىسقا اپارىپ سوقتى. باتىس ەلدەرى قىتاي ۇكىمەتىنىڭ ىندەتتى جاسىرۋى جاھاندىق پاندەمياعا اينالدىردى دەپ ايىپتايتىنى بەلگىلى. وسىنىڭ ءبارى قازىرگى اقش-قىتاي جانە بريتان-قىتاي قاتىناسىن تەرەڭ قايشىلىققا ۇلاستىردى. تاريحي تۇرعىدا اعىلشىن-قىتاي قاتىناسىنىڭ بۇگىنگىدەي شيەلەنىسكە جەتۋى تابيعي جاعداي دەۋگە دە بولادى. الەمدىك ساحنادا جىل سايىن ىقپالى ارتىپ كەلە جاتقان قىتاي باتىس الەمىندەگى ليدەرلەرمەن تۇبىندە قايشىلىققا كەلەتىنىن و باستان بەلگىلى بولاتىن.

پومپوە لوندونداعى ارىپتەستەرىنىڭ كەزەكتى قادامدارىنا قولداۋ ءبىلدىردى جانە دەموكراتيالىق ەلدەردى قىتايعا قارسى بىرىگۋگە شاقىردى. دەگەنمەن، پومپەوعا كەزدەسۋدەن بۇرىن پرەمەر-ءمينيسترى بوريس جونسون: «ءبىز بارىنشا جۇيەلى ءارى ۇقىپتى ارەكەت ەتەتىن بولامىز. ءبىز قىتايدىڭ كەيبىر ارەكەتتەرىنە قاتاڭ رەاكتسيا بىلدىرەمىز، بىراق ءبىز قىتايمەن قارىم-قاتىناستى جالعاستىرا بەرەمىز»، – دەگەن.

“The Qazaq Times”