ەرتە كوكتەمنىڭ ەلەۋلى كۇنى، الەم-جارىقتىڭ سۇلۋلىعىن اسپەتتەيتىن 8 ناۋرىز – حالىقارالىق ايەلدەر مەن ارۋلار مەرەكەسى. جازعىتۇرىمنىڭ ءا دەگەننەن العاشقى جىلى لەبى سەزىلەتىن اتاۋلى مەرەكە ەلدىڭ كوڭىلىن ىستىق لەبىزگە تولتىرىپ، شات اسەر سىيلايدى. تىرشىلىكتىڭ تۇلەۋىنە جاقىن بۇل مەزگىلدە بارلىق نازىك جاندىنىڭ شالقىعان كوڭىلى كوكتەمنىڭ حابارشىسى سەكىلدى ءار جۇرەككە جىلۋ ۇيالاتادى. ءبىرى اناسىنا، ەندى ءبىرى اجەسىنە، جارى نە اپكە-قارىنداسىنا، ۇستازىنا ارنايىلاپ قۇشاق-قۇشاق گۇل كوتەرىپ جۇرگەن كوپشىلىكتىڭ جانارىنان ماحاببات پەن ءىلتيپات ەسەتىن كۇن.
حالىق اۋزىندا «دۇنيەدە ءۇش نۇر بار. ءبىرىنشىسى – كۇننىڭ نۇرى، ەكىنشىسى – اقىلدىڭ نۇرى، ال ءۇشىنشىسى – انانىڭ نۇرى» دەگەن ۇلاعاتتى ءسوز بار. بۇل – قادىم زامانداردان تىرشىلىك اتاۋلىنىڭ انادان تارايتىندىعىن مەڭزەيتىن اسىل ۇعىم ىسپەتتى.
ەلىمىزدىڭ دامۋىنا ولشەۋسىز ەڭبەك سىڭىرگەن ارقانداي ايەلدىڭ ءومىر جولى – تۇنعان شەجىرە. قوعامنىڭ بارلىق سالاسىندا ايانباي ەڭبەك ەتە ءجۇرىپ، جاقىندارىنا جىلۋ سىيلاي بىلەتىن ايەلدەر قاۋىمى قانداي قۇرمەتكە دە لايىق.
قازاق تاريحىندا ەسىمدەرى التىن ارىپتەرمەن ورنەكتەلگەن تۇمار حانىم، ۇماي انا، ايشا ءبيبى، دومالاق انا، قولباسشى بوپاي حانىم سەكىلدى تۇتاس ۇلتتى تاربيەلەپ، حالىقتى قالىپتاستىرىپ، مەملەكەتىمىزدى باياندى ەتۋگە مول ۇلەس قوسقان انالارىمىزدىڭ يگىلىكتى ءىسىن بۇگىندە زيالى، ەل بولاشاعىنا بەيجاي قاراي المايتىن ازاماتتىق-قوعامدىق بەلسەندىلەر قاتارىنداعى قىز-كەلىنشەكتەر جالعاستىرۋدا.
وسى ورايدا “The Qazaq Times” ۇجىمى اتىنان، قازاقستانداعى جانە الەمدەگى بارلىق ايەلدەر قاۋىمىن بۇگىنگى مەرەكەمەن شىن جۇرەكتەن قۇتتىقتايمىز! اسىل انالارىمىزدىڭ، اياۋلى اپكە-قارىنداستارىمىزدىڭ ومىرلەرىنىڭ شۋاقتى نۇرعا تولۋىن، ءار كۇنىنىڭ مەرەكەدەي مەرەيلى بولۋىن تىلەيمىز! جەر جۇرتشىلىعىنىڭ بارشا ايەل زاتىنا زور دەنساۋلىق، وتباسىنا اماندىق، باياندى باقىت، ەڭبەكتە تابىس تىلەي وتىرا، سايتىمىزدىڭ وقىرمانى بولعان قازاقتىڭ قاراكوزدەرىن، اسىل ارۋلارىن جانە اق جۇرەكتى بارشا وقىرمانىمەن بىرگە ۇجىمدا قىزمەت ەتكەن قىزدارىمىزدىڭ دا مەرەكەسىنە قۇتتى بولسىن ايتامىز!

“The Qazaq Times”