اقش پەن فيليپپين تەرروريزمگە قارسى كۇرەس نەگىزىندە ەكى ەلدىڭ قارۋلى كۇشتەرى اراسىنداعى ىنتىماقتاستىقتى وتە جوعارى دەڭگەيدە دامىتپاق. اقش ارمياسىنىڭ ءباسپاسوز وكىلى ماككارتي بۇل قادامدار ارتىپ كەلە جاتقان قىتاي قاۋپىنە قارسى جاسالىپ وتىرعانىن راستاعان.

ماككارتيدىڭ ايتۋىنشا، بىلتىر كوكتەمدە اقش اسكەرلەرى فيليپپين جەرىندە سول ەلدىڭ جاۋىنگەرلەرىمەن بىرگە جاتتىعۋ وتكىزگەن. «ءبىز فيليپپينگە كوپ مولشەردە ينۆەستيتسيا سالۋدىڭ جولدارىن قاراستىرىپ كەلەمىز. قازىر، ەكى ەلدىڭ اراسىنداعى قورعانىس ىنتىماقتاستىعى بيىك دەڭگەيگە كوتەرىلدى. جانە ءبىز وسى قارىم-قاتىناستى ءتىپتى دە دامىتا بەرۋگە تىرىسامىز»، – دەگەن ماككارتي.

ءفيليپپيننىڭ وڭتۇستىك قىتاي تەڭىزىندە قىتايمەن داۋلى سۋ ايدىندارىنداعى ەگەمەندىك قۇقىقتارىن قورعاۋعا اقش قولداۋ كورسەتىپ كەلەدى. اسىرەسە، تەڭىز ارميا قوسىندارى مەن اۋە كۇشتەرى تالاستى ايماقتار مەن ماڭىزدى سۋ جولدارىندا تەرروريزمگە قارسى بىرلەسكەن كۇرەس جۇرگىزۋدە.

سوڭعى جىلدارى اقش ۇلتتىق قورعانىس ستراتەگياسىن جاڭالاپ، قىتايدىڭ ءۇندى جانە تىنىق مۇحيتى ايماعىندا جىل سايىن ارتىپ كەلە جاتقان قاۋىپىنە قارسى ارەكەت باستادى. ايتالىق، وڭتۇستىك قىتاي تەڭىزى جانە تىنىق مۇحيتتاعى ارالدى مەملەكەتتەرمەن قورعانىس ىنتىماقتاستىعىن دامىتتى. وڭتۇستىك كورەيا، جاپونيا، تايۋان (تايۆان), فيليپپين، ۆەتنام جانە اۋستراليا قاتارلى ەلدەرمەن قۇرعان قورعانىس ىنتىماقتاستىعى قىتايدىڭ شىعىس، وڭتۇستىك شىعىس جانە وڭتۇستىگىنە قاراي اسكەري، ساياسي ىقپالىنىڭ كەڭەيۋىنە توسقاۋىل بولۋى مۇمكىن.

“The Qazaq Times”