اقش وداقتاستارىن رەسەي مەن قىتايعا قارسى كۇرەسۋگە شاقىردى

بەرلين قورعانىنىڭ قۇلاعانىنا 30 جىل تولدى. بۇل وتكەن عاسىرداعى ۇلكەن سيمۆولدىق مانگە يە وقيعالاردىڭ ءبىرى. سەبەبى، بەرلين قورعانى ءبىر عانا شىعىس جانە باتىس گەرمانيانى ەكىگە بولگەن جوق، ول سول تۇستاعى باقتالاس ەكى ۇلكەن يدەولوگيانىڭ شەكاراسى ەدى. بەرلين قورعانى قۇلاعاننان كەيىن الەمدەگى ەڭ ۇلكەن كوممۋنيستىك رەجيم دە ىدىراپ، باتىستىق «ەركىن الەم» كەڭ ەتەك الا باستاعان ەدى. ال، بەرلين قورعانى قۇلاپ، 30 جىل وتكەننەن كەيىن دە اقش ءوز وداقتاستارىن رەسەي مەن قىتاي قاۋپىنە قارسى كۇرەسۋگە شاقىردى.

اقش مەملەكەتتىك حاتشىسى مايك پومپەو كەزەكتى مالىمدەمەسىندە اتاۋلى تاريحي داتانى اتاي وتىرىپ، اقش-تى جانە ونىڭ وداقتاستارىن ءالى دە قاۋىپتى بولىپ وتىرعان كوممۋنيستىك قارسىلاستارىنا قارسى كۇرەسۋگە شاقىردى. ونىڭ ايتۋىنشا ەركىن الەم رەسەي مەن قىتايدان تونەتىن قاۋىپكە قارسى كۇرەسۋدى جالعاستىرۋى كەرەك.

بەرليندەگى براندەنبرۋگ قاقپاسىندا ءسوز سويلەگەن پومپەو رەسەيدىڭ كورشىلەس ەلدەرگە اگرەسسيالىق ارەكەتتەرى تۋرالى توقتالدى. ول ماسكەۋ بيلىگىنىڭ ءبىر ەلگە باسىپ كىرىپ، وزىنە قارسى ساياسي كۇشتەردى «ولتىرگەنىن» اتاپ وتكەن. رەسەيدىڭ ۋكرايناداعى ارەكەتتەرىن ايىپتاي كەلىپ، ەۋروپا ەلدەرىنىڭ مۇنداي قاۋىپتى ارەكەتتەرگە ءسال قاراماۋىن ەسكەرتكەن.

رەسەيگە قوسا، اقش مەملەكەتتىك حاتشىسى بەيجىڭ ساياساتىندا سىنعا الا كەتكەن. ول جينالعاندارعا: «قىتايدا قىتاي كوممۋنيستىك پارتياسى اۆتوريتاريزم تۋرالى جاڭا كوزقاراستى قالىپتاستىرۋدا»، - دەگەن پىكىرىن ايتتى. پومپەو قكپ-نىڭ قىتاي حالقىن باسۋ ءۇشىن ءتۇرلى قۇرالداردى پايدالانىپ وتىرعانىن، شىڭجاڭدا مۇسىلمان ازشىلىقتارىنا باعىتتالعان رەپرەسسيا جۇرگىزىپ وتىرعانىن، شەتەلگە پانا ىزدەپ شىققان تۇلعالاردى قۋدالاپ وتىرعانىن اتاپ وتكەن.

پومپەونىڭ قىتايعا قاراتقان ايىپتاۋلارىن قىتاي ءسىم تارابى تەز ارادا تەرىستەپ مالىمدەمە جاسادى. قازىر قىتايدىڭ ءوز حالقىنا جاساپ وتىرعان باسسىزدىقتارى مەن زاڭسىزدىقتارى باتىس ەلدەرىنە بەلگىلى بولدى. باتىس ەلدەرى جاعىنان قىتاي ۇكىمەتى سەنىمسىز ءارى ىرىقسىز كۇيگە قالىپ بارادى. بىراق، بەيجىڭ ءوزىنىڭ ارەكەتىن اقتاۋدا بەلسەندى كۇيدەن جاڭىلماي كەلەدى.

“The Qazaq Times”