فوتو: centralasian.org

تءاجىكستان بيلىگى، تۇتقىن الماسۋ تۋرالى كەلىسىمگە سءايكەس، 48 تۇتقىندى اۋعانستانعا قايتاردى. بۇل تۋرالى ورتالىق ازيا جاڭالىقتار قىزمەتى حابارلادى.

تاجىك بيلىگىنىڭ حابارلاۋىنشا، اۋعانستانعا قايتارىلعان ازاماتتار كەزىندە ەسىرتكى كونترابانداسى ءۇشىن سوتتالعان. ولار جازانىڭ قالعان مەرزىمىن اۋعانستان تۇرمەلەرىندە وتەيدى.

تۇتقىنداردى كورشى ەلگە تاپسىرۋ دۇيسەنبى كۇنى تومەنگى پياندج شەكارا ايماعىندا ءوتتى. اۋعانستان بيلىگى تاجىكستانعا بىرنەشە تاجىك ازاماتىن قايتارعانىن مالىمدەگەن. ولار "تەرروريستىك ارەكەت" ءۇشىن سوتتالعان. كابۋلدان دۋشانبەگە جەتكىزىلگەن تاجىك تۇتقىندارىنىڭ ناقتى سانى ايتىلمادى.

تاجىكستان مەن اۋعانستان بيىل وسىمەن ەكىنشى مارتە تۇتقىن الماسىپ وتىر. ماۋسىم ايىندا تاجىك بيلىگى اۋعانستانعا 80 ازاماتتى قايتارعان.

"The Qazaq Times"