تاۋىق نەگە ۇشپايدى؟

توپان سۋعا دەيىن قارعا مەن تاۋىق دوس بولىپتى. ول كەزدە قارعا اق ءتۇستى، ال تاۋىق ۇشاتىن قۇس ەكەن. توپان سۋ باسقاندا كەمەگە ەكەۋى قاتار جايعاسىپتى.
كەمەنى شالدىراتىن مەزگىل تاقايدى. بىراق سۋدىڭ قانشالىقتى تارىلىپ، قۇرعاق جەردىڭ بار جوعىن ءبىلۋ مۇمكىن ەمەس ەدى. نۇح:
– سۋدىڭ قانشالىقتى تارتىلعانىن كىم ءبىلىپ كەلەدى؟ – دەيدى. قارعا:
– ىقتيار ەتسەڭىز، مەن ۇشايىن، – دەيدى.
– سەن جەمتىككە ءۇيىر ەدىڭ. دالادا ولەكسە بولۋى مۇمكىن. قىزىعىپ قالىپ قويساڭ شە؟
– ماعان سەنىڭىز. ءبىر زاماندا ادام اتاعا جول كورسەتكەن مەن ەدىم.
– كەلمەي قويساڭ، سەنى كوپ كۇتۋگە مۇرشامىز جوق. كەپىلدىككە نە قالدىراسىڭ؟ – دەدى. سوندا تاۋىق:
– قارعا قيماس دوسىم. دوس ءۇشىن ەكى قاناتىمدى كەپىلدىككە مەن قويامىن، – دەدى. پايعامبار كەلىستى.
قارعا ۇشىپ شىقتى. قاراسا، ءبىراز جەر اشىلىپ، قۇرعاپ قالىپتى. توپان سۋعا تۇنشىعىپ ولگەن جان-جانۋاردىڭ ولىگى شاشىلىپ جاتىر. كەمەدەن اشقۇرساق شىققان قارعا ولەكسەنى كورگەندە ارانى اشىلىپ، كەمەدەگى ەل-جۇرتتى ۇمىتتى. نۇح ونى كۇتە-كۇتە شىدامى تاۋسىلدى. «ىزدەپ كەل» دەپ ساۋىسقاندى جىبەردى. ول دا جەمتىك جەپ قالىپ قويدى. ءۇشىنشى جولى كەپتەر ۇشتى. ول ءزايتۇن اعاشىنا قوندى. اعاشقا بۇرىنعى جويىلعان قاۋىم مەن ولگەن ماقۇلىقتىڭ قانى جۇققان ەكەن. ونىڭ اياعى قانعا ءتيىپ قىزارىپ كەتەدى. سودان باستاپ كەپتەردىڭ اياعى قىزىل بولىپتى.
كەپتەر ءزايتۇن اعاشىنىڭ ءبىر جاپىراعىن تىستەپ، كەمەگە ورالدى. نۇح كەپتەردەن:
– انا ەكەۋىنەن حابار بار ما؟ امان با ەكەن؟ – دەپ سۇرادى. كەپتەر:
– ءيا، كوردىم. قارعا ولگەن مالدىڭ باسىن، ساۋىسقان كوتەنشەگىن شۇقىپ وتىر، – دەدى. نۇح ىزا بولىپ:
– جەگەندەرىڭ جەمتىك، ىشكەندەرىڭ ىرتىك بولسىن! – دەگەندە ەكى قۇستىڭ ۇسقىنى كەتەدى. قارعا قارا ءتۇستى قۇسقا اينالادى. وسىدان باستاپ، ول ولگەن مال كورسە باسىن، ساۋىسقان قۇيرىعىن شوقيتىن بولىپتى. نۇح كەپتەرگە:
– ادالدىعىڭ ءبىلىندى. قارنىڭ اشسا، ادامنىڭ قولىنان جەم جە، شاتىرىنا ۇيا سال! – دەدى. سوسىن پايعامبارعا تاۋىق كەلىپ:
– قاناتىمدى بەر، – دەدى. نۇح:
– دوسىڭ سەنى ساتىپ كەتتى. ول كەلسىن، قاناتىڭدى سوسىن الاسىڭ، – دەدى. تاۋىق وسىلايشا ۇشا الماي قالادى. كۇن سايىن تاڭ مەزگىلى بولعاندا، «قارعا قاناتىمدى قايتار» دەپ شاقىرادى ەكەن. سول كەزدە ەلدەر ۇيقىدان وياناتىن بولىپتى.

دەرەككوز: http://bit.ly/2hiyVVq