اقش مەملەكەتتىك حاتشىسى مايك پومپەو قىتاي ۇكىمەتى «ءوز ازاماتتارىن قىرىپ-جويىپ جاتىر» دەپ ايىپتادى جانە قىتاي بيلىگىنىڭ شىنجاڭداعى ارەكەتى تەرروريزممەن ەش قاتىسسىز ەكەنىن ايتتى.

پومپەو جەكسەنبى كۇنى جۋرناليستەردىڭ سۇراعىنا جاۋاپ بەرگەن كەزدە: «تەرروريزم ماسەلەسىنە كەلگەندە، مەن قىتاي ۇكىمەتىنىڭ شىنجاڭدا جاساپ وتىرعان ارەكەتتەرى ەشقاندايدا تەرروريزمگە قارسى كۇرەسپەن قاتىسى جوق ەكەنىن تۇسىندىرگىم كەلەدى. بۇل قىتايدىڭ ءوز ازاماتتارىن قۇرتۋ ارەكەتى. ءبىز الەمدەگى بارلىق ەلدەردى قىتاي ۇكىمەتىنىڭ ۇيعىرلاردى كەرى قايتارۋ تۋرالى وتىنىشىنە بويكوت جاريالاۋعا شاقىرامىز»، – دەدى.

پومپەو ورتالىق ازيا ەلدەرىنىڭ ءسىم باسشىلارىمەن باس قوسقان بولاتىن. فوتو: VOA.

پومپەو بۇل اتالعان مالىمدەمەسىن «س5+1» كەزدەسۋىنەن كەيىن وتكەن ءباسپاسوز جيىنىندا ايتقان. ول بۇل كەزدەسۋدە ورتا ازيا ەلدەرىنىڭ سىرتقى ساياسي ۆەدومستۆو باسشىلارى جانە وكىلدەرىمەن كەزدەسكەن بولاتىن.

بۇۇ باس اسسامبلەياسىنىڭ سەسسياسىندا ۋاشينگتون شىنجاڭ ماسەلەسى بويىنشا بەيجىڭدى ايىپتاماق. بۇعان قوسا، اقش ۇكىمەتىنىڭ بىرقاتار شەنەۋنىكتەرى قىتاي بيلىگىنىڭ شىنجاڭ ساياساتىنا بايلانىستى حالىقارالىق كونفەرەنتسيالار دا ۇيىمداستىرماق.

ايتا كەتەيىك، بۇۇ مالىمدەمەسىندە قىتايدىڭ شىنجاڭ جەرىندە كەمىندە 1 ميلليوننان استام مۇسىلمان ازشىلىقتارى ساياسي لاگەرلەردە قاماۋدا ەكەنىن ايتىلادى. بەيجىڭ شىنجاڭداعى لاگەرلەردى «كاسىپتىك ءبىلىم بەرۋ» نەمەسە «قايتا تاربيەلەۋ ورتالىقتارى» دەپ تۇسىندىرۋگە تىرىسىپ كەلەدى. بىلتىر ترامپ ۇكىمەتى قىتاي كوممۋنيستىك پارتياسىنىڭ شىنجاڭعا قاتىستى جوعارى دارەجەلى شەنەۋنىكتەرىن سانكتسيا تىزىمىنە ەنگىزبەك بولعان. الايدا، بەيجىڭنىڭ «كەك الۋ ارەكەتتەرىنەن» الاڭداعان ۋاشينگتون لاۋازىمدىلارى جوبانى كەيىنگە قالدىرعان.

“The Qazaq Times”