ۇشتىك سامميت ءسۇريانىڭ ەگەمەندىگى مەن تەرريتورياسى تۋرالى تالقىلادى

تۇركيا، يران جانە رەسەي باسشىلارى انكارادا باس قوستى. ءسۇريا تاقىرىبىن تالقىعا سالعان «ۇشتىك سامميتتە» 14 تارماقتان تۇراتىن قورىتىندى دەكلاراتسيا جاريالاندى. ورتاق مالىمدەمەدە ءسۇريانىڭ تەرريتوريالىق تۇتاستىعىن ساقتاپ قالۋدى قولدايتىندارىن ءبىلدىردى.

تۇركيا پرەزيدەنتى رەجەپ تايىپ ەردوعان يران پرەزيدەنتى حاسان رۋحاني جانە رەسەي پرەزيدەنتى ۆلاديمير پۋتينمەن انكارادا باس قوستى. «استانا پروتسەسى» اتالعان بەيبىتشىلىك كەلىسسوزدەرىنىڭ جالعاسى نەگىزىندە ءۇش ەل باسشىسى ءسۇريانىڭ تەرريتوريالىق تۇتاستىعىن جانە ەگەمەندىگىن ساقتاي وتىرىپ جاڭا ءسۇريا قۇرۋ تۋرالى مالىمدەمە جاسادى. ولار سامميت قورىتىندىسى نەگىزىندە حالىقارالىق قاۋىمداستىقتان سۇرياعا بەرىلەتىن گۋمانيتارلىق كومەكتى كوبەيتۋدى سۇرادى.

ورتاق دەكلاراتسيادا سۇرياعا ارنالعان گۋمانيتارلىق كومەك، كونستيتۋتسيالىق كوميتەت جۇمىستارى، بۇۇ-نىڭ ءسۇريا ءىسى جونىندەگى ارنايى وكىلىنىڭ جۇمىستارى جانە بوسقىنداردى سۇرياعا قايتارۋ تۋرالى تاقىرىپتار قوزعالعان.

رەسەي، تۇركيا جانە يران ءسۇريا ماسەلەسىندەگى باستى ويىنشىلار رەتىندە بەلگىلى. «استانا پروتسەسىنەن» جالعاسقان «ۇشتىك سامميت» سۇرياداعى ورتاق مۇددەلەردى ۇيلەستىرۋگە باعىتتالعان. ايتالىق، تۇركيا ەلىندەگى سۇريالىق بوسقىنداردى قايتارىپ، ونى ءسۇريا جەرىندەگى كۇردتەرمەن اراداعى بۋفەرلىك زونا رەتىندە پايدالانباق. ال، رەسەي وزىنە جاقىنداي تۇسكەن «باتىستىق ارانداتۋدىڭ» «الدىن الماق»، يران بولسا ءسۇريا جەرىنەن پايدالانىپ، يزرايلگە قىسىمدى ارتتىرماق. بۇل «ۇشتىك ءسامميتتىڭ» ءار رەتكى وتىرىسىنداعى باستى ماقساتى دەۋگە بولادى.

جيىن قورىتىندىسىندا حابارلانعانىنداي، «ۇشتىك سامميتتىڭ» كەلەسى راۋندى تەھراندا وتەدى.

“The Qazaq Times”