تۇركيا پرەزيدەنتى رەجەپ تايىپ ەردوعان ءسۇريا ماسەلەسى تۋرالى ەۋروپاعا ەسكەرتۋ جاسادى. ول مالىمدەمەسىندە ەگەر تۇركيانىڭ ءسۇريا جەرىنىڭ سولتۇستىگىندە قاۋىپسىز ايماق قۇرۋ جوسپارىنا قولداۋ بىلدىرمەسە، ميلليونداعان سۇريالىق بوسقىندار ەۋروپاعا اعىلاتىنىن ەسكەرتتى.

«لوگيستيكالىق كومەككە» مۇقتاج ەكەنىن بىلدىرگەن تۇرىك پرەزيدەنتى: «بىزگە قولداۋ كورسەتىڭىزدەر، ايتپەگەندە ميگرانتتارعا جولدى اشىپ بەرۋدەن باسقا شارا جوق»، – دەدى. بۇنىمەن قوسا ەردوعان ءسۇريانىڭ سولتۇستىگىندەگى قاۋىپسىز ايماققا ميلليوننان استام بوسقىندى ورنالاستىرۋ تۋرالى جوسپارىن دا جەتكىزدى.

قازىر تۇركيانىڭ تەرريتورياسىندا 3,5 ملن-عا جۋىق سيريالىق بوسقىننىڭ بار ەكەنى بەلگىلى. انكارا «قاۋىپسىز ايماقتى» ەلىندەگى بوسقىنداردى شىعارۋ ءۇشىن پايدالانىپ قانا قالماق ەمەس. بۇنى بولاشاقتا كۇرد قارۋلى توپتارىمەن ارالىقتاعى «بۋففەرلىك زونا» رەتىندە دە پايدالانباق. ارينە، ءسۇريا جەرىندە مۇنداي قاۋىپسىز ايماق قۇرۋ جوسپارىنا اقش-تا قىزىعۋشىلىق تانىتقانى بەلگىلى. الايدا، وزدەرىن يسلام مەملەكەتى» دەپ اتاعان قارۋلى توپقا قارسى كۇرەستە سەنىمدى وداقتاسى بولعان كۇرد قارۋلى كۇشتەرى انكارانىڭ جوباسىنان الاڭداۋلى. ولار «قاۋىپسىز ايماققا» تۇرىك ارمياسىنىڭ كەلۋىن قالامايدى.

ال ەردوعان بولسا: «ءبىزدىڭ ماقساتىمىز – ميلليونعا جۋىق سۇريالىق باۋىرلارىمىزدى قاۋىپسىز زوناعا كوشىرۋ. مۇنداي زونانى 450 شاقىرىمعا سوزىلعان شەكارانى بويلاي قۇراتىن بولامىز. بىزگە لوگيستيكالىق قولداۋ كورسەتىڭىزدەر. ءبىز ءسۇريانىڭ سولتۇستىك شەكاراسىنان 30 شاقىرىمعا دەيىن كىرىپ بارىپ، بوسقىندارعا تۇرار-جاي قۇرامىز»، – دەدى.

2016 جىلى ەۋروپا وداعى مەن تۇركيا سۇريالىق بوسقىندارعا بايلانىستى كەلىسىم جاساعان. كەلىسىم بويىنشا، تۇركيا شەكارانى قاتاڭ باقىلاۋعا الىپ، سۇريالىق بوسقىنداردى ەۋروپاعا وتكىزبەيدى. بۇنىڭ ەسەسىنە ەو تۇركياعا 6 ملرد ەۆرو كولەمىندە جاردەماقى بەرەدى. ەو 5,6 ملرد ەۆرو اۋدارعانىن مالىمدەگەن ەدى، الايدا انكارا تەك 3 ملرد ەۆرو عانا العانىن ايتۋدا.

“The Qazaq Times”