يزرايل تۇرمەسىندەگى بالالار: بالالاردى اسكەري سوتقا تارتاتىن ەل

حالىقارالىق ادام قۇقىعىن قورعاۋ ۇيىمدارى ءيزرايلدىڭ پالەستينالىق جاس وسپىرىمدەردى سوتتاۋ جانە سوتسىز قاماۋ ارەكەتتەرىنە نارازىلىق بىلدىرۋدە. الايدا، حالىقارالىق قاۋىمداستىق تاراپىنان يزرايلعا انىق شارالار قولدانىلعان ەمەس.

اسكەري سوت ارقىلى شەتەلدىك بالالاردى سوتتاۋ، قاماۋ جازاسى الەمدە تەك ءبىر عانا ەلدە بار. قازىردىڭ وزىندە يزرايل تۇرمەسىندە 500-دەن استام پالەستينالىق بالالاردىڭ وتىرعانى ءمالىم. ەڭ قىزىعى، ولارعا تاعىلعان ايىپتار دا انىق ەمەس. كەيبىرى يزرايل زاڭىنا سايكەس سوتسىز قامالعان.

يزرايلدە قامالعان بالالاردىڭ قۇقىعىن قورعاۋشى زاڭگەر زاحار ءفرانسيستىڭ ايتۋىنشا، 14 جاستاعى بالانى ۇيىنەن تۇتقىنداپ كەتۋ وتباسىنى ءبۇلدىرۋ ارەكەتىمەن بىردەي. «مەن قاۋىپسىزدىك ءۇشىن جاسالعان ارەكەت دەگەنگە سەنمەيمىن. اڭگىمە باقىلاۋدا. بۇل قوعامعا، جاس بالالارعا قارسى قىسىم جاساۋ»، – دەيدى زاڭگەر BBC ارناسىنا بەرگەن سۇحباتىندا.

يزرايل تارابى ادەتتەگىدەي ايىپتاۋدىڭ ءبارىن جوققا شىعارادى جانە تەررورلىق توپتارمەن قاتىسى بار بىرنەشە پالەستينالىق بالانىڭ عانا قاماۋدا وتىرعانىن ايتادى.

 “The Qazaq Times”