اق كيىمدىلەر شەرۋى. فوتو: BBC,

كەشە، 9 ماۋسىم جەكسەنبى كۇنى گونكونگتە اۋقىمدى نارازىلىق شەرۋى ءوتتى. ءجۇز مىڭداعان نارازى جۇرت كوشەگە شىعىپ گونكونگ ازاماتتارىنىڭ قىتايعا ەكستراديتسيالاۋ تۋرالى زاڭعا نارازىلىق تانىتقان. الايدا، قىتاي ۇكىمەتى بۇل نارازىلىق اكتسياسىن «شەتەلدىك كۇشتەر ۇيىمداستىردى»، «ولار قىتايعا زيان كەلتىرۋگە تىرىسۋدا» دەپ مالىمدەدى.

 مۇنداي اسا اۋقىمدى نارازىلىق شەرۋى گونكونگتە 1997 جىلدان بەرى بولعان ەمەس. سول تۇستا بريتانيا ۇكىمەتى گونكونگتى قىتاي ۇكىمەتىنىڭ ايرىقشا باسقارۋ تارتىبىنە وتكەرىپ بەرگەن بولاتىن. بۇعان نارازى ءجۇز مىڭداعان ادام كوشەگە شىعىپ، قحر بيلىگىن قابىلداۋعا قارسى نارازىلىق بىلدىرگەن.

بۇدان بۇرىن بەيجىڭ قاندايدا ءبىر ولكەلىك ۇكىمەت تارابىنان ايىپتالعان گونكونگتىك ازاماتتاردى قحر ىشكى ولكەلەرىنە، تايۋان جانە ماكاوعا ەكستراديتسيالاۋ تۋرالى زاڭدى بەكىتكەن بولاتىن. ەكستراديتسيالاۋ تۋرالى زاڭنىڭ وزگەرىسى سەبەپ بولعان بۇل رەت شەرۋگە قاتىسۋشىلار ميلليوننان استامنىڭ نارازىلىق شاراسىنا قاتىسقانىن ايتتى. الايدا، پوليتسيا تارابى بۇل ساندى 240 مىڭ ادام دەپ كورسەتكەن. نارازى توپ بەيجىڭنىڭ كەكتى شەشىمى گونكونگتىڭ اۆتونوميا قۇقىعىن اياققا تاپتاۋ دەپ باعالاعان.  گونكونگتىڭ پارلامەنتى اتالعان زاڭ جوباسىن 12 ماۋسىم كۇنى قارايتىن بولادى.

ءجۇز مىڭداعان ادام اق ءتۇستى كيىم كيىپ، قالا كوشەلەرىندە شەرۋ وتكىزدى. شەرۋ سوڭى پوليتسيامەن قاقتىعىسقا ۇلاستى. بۇل نارازىلىقتى ءتىپتى دە كۇشەيتىپ، نارازى توپ پارلامەنت عيماراتىنا كىرۋگە ارەكەت ەتكەن.

بەيجىڭ بيلىگى گونكونگتەگى اۋقىمدى نارازىلىق شاراسى تۋرالى اقپاراتتى قىتايدىڭ ءوز ىشىندە تاراتۋعا تسەنزۋرا قويعان. ال، قىتايدىڭ سىرتقا باعىتتالعان كەيبىر رەسمي اقپارات قۇرالدارى بولسا، ماسسالىق نارازىلىق شاراسىنا شەتەلدىك كۇشتەردى ايىپتاپ، حابارلار تاراتقان.

“The Qazaq Times”