ەكى رەتكى زىمىران سىناعى ترامپتىڭ ءۇمىتىن ۇزە العان جوق

سولتۇستىك كورەيا جاقىندا عانا اراسىنا 5 كۇن سالىپ، ەكى بىردەي زىمىران سىناعىن جاسادى. بۇعان حالىقارالىق قاۋىمداستىق ەلەۋلى الاڭداۋشىلىق ءبىلدىردى. سونىمەن بىرگە، سولتۇستىك كورەيانىڭ كەزەكتى ارەكەتى الەم ەلدەرىنىڭ اقش-حدر اراسىنداعى يادرولىق قارۋدان باس تارتۋ تۋرالى كەلىسسوزدىڭ ناتيجەسىنە دەگەن سەنىمىن دە ازايتتى. الايدا، اقش پرەزيدەنتىنىڭ بۇل تۋرالى پىكىرى بۇتىندەي ولاي بولماي شىقتى.  

امەريكا قۇراما شتاتتارىنىڭ پرەزيدەنتى دونالد ترامپ، سولتۇستىك كورەيانىڭ سوڭعى ەكى زىمىران سىناعى تۋرالى ءوز پىكىرىن ءبىلدىردى. ونىڭ ايتۋىنشا، پيوڭياڭنىڭ (پحەنيان) سوڭعى ەكى رەتكى زىمىران سىناعى اقش-قا دەگەن سەنىم مەن ۋادەنىڭ بۇزىلۋى سانالمايدى. ول مۇنداي مالىمدەمەسىن وتكەن جۇمادا Politico  جاڭالىقتار سايتىنا بەرگەن سۇحباتىندا ورتاعا سالعان.

ترامپ سوزىندە: "بۇل قىسقا قاشىقتىققا ارنالعان زىمىراندار. بۇل بۇنى بۇتىندەي سەنىمنەن كەتۋ دەپ ەسەپتەمەيمىن. بىلەسىز بە، سولتۇستىك كورەيا ءبىر كەزدەرى ۋادەسىن بۇزعانى راس. بىراق، بۇل جولى ەمەس", – دەگەن. سولتۇستىك كورەيانىڭ كەزەكتى زىمىران سىناعى اقش ەكى اراداعى كەلىسسوز سەنىمدىلىگىنە كەرى اسەر تيگىزگەنىنە قاراماستان، ترامپ سولتۇستىك كورەيا باسشىسى كيم جوڭ ۋن مەن ءالى دە تىعىز قارىم-قاتىناستا ەكەنىن ايتقان.

ەكى ەل باسشىسى سينگاپۋردا جانە ۆەتنامدا ەكى رەت كەلىسسوز وتكىزگەن. سوڭعى كەزدەسۋ ۋاقىتىنان بۇرىن اياقتالىپ، تاراپتار يادرولىق قارۋدان باس تارتۋ تۋرالى ناقتى كەلىسىمگە قول جەتكىزە الماعان. سولتۇستىك كورەيا قۇراما شتاتتاردان ەكونوميكالىق سانكتسيانى الىپ تاستاۋدى تالاپ ەتكەن. ال، ۋاشينگتون بولسا، سولتۇستىك كورەيا يادرولىق قارۋدان تولىق باس تارتپاي تۇرىپ، سانكتسيالار الىنبايتىنىن، ەكونوميكالىق قولداۋ دا بولمايتىنىن ايتقان.

“The Qazaq Times”