گونكونگ پورتىنا كىرگەن اقش پاترۋلدىك كەمەسى قىتايعا قارسى قىسىمدى ارتتىردى

ءبىر كۇن بۇرىن اقش-تىڭ تەڭىز جاعالاۋىن كۇزەتۋشى «بەرتولف» پاترۋلدىك كەمەسى گونكونگ پورتىنا كەلىپ توقتادى. بۇل اقش اسكەري كەمەسىنىڭ 17 جىلدان بەرى العاش رەت گونكونگ پورتىنا كىرۋى.

«بەرتولف» پاترۋلدىك كەمەسى مەن اقش تەڭىز فلوتىنا تيەسىلى اسكەري كەمەلەر ناۋرىز ايىنىڭ سوڭىندا تايۋان بۇعازىنان ءوتىپ، قۇراما شتاتتىڭ ءۇندى-تىنىق مۇحيتىنىڭ اشىق ءارى ەركىن تەڭىز ايماعىنا بولعان ۇستانىمىن كورسەتكەن بولاتىن.

دۇيسەنبى كۇنى اقش ءۇندى-تىنىق مۇحيت قولباسشىلىق باس شتابى مالىمدەمە جاساپ، «بەرتولف» كەمەسىنىڭ وفيتسەرلەرى گونكونگتاعى بىرقاتار شارالارعا قاتىساتىنىن ايتقان. ءۇندى-تىنىق مۇحيت قولباسشىلىق باس شتابى سونداي-اق، قۇراما شتات تەڭىز كۇشتەرى ءۇندى مۇحيتى مەن تىنىق مۇحيتىنداعى وداقتاس ەلدەرمەن بىرلەسە وتىرىپ، ايماقتاعى حالىقارالىق سۋ جولدارىنىڭ جالپىعا بىردەي اشىق بولۋىنا كەپىلدىك ەتەدى. سونىمەن بىرگە ءۇندى-تىنىق مۇحيت ايماعىنداعى سۋ ءۇستى تەرريتوريالارىن، ەگەمەندىكتى، حالىقارالىق ەرەجەلەردى قورعايتىنىن ايتىپ كەلەدى.

اتالعان شارلاۋشى كەمە 2006 جىلى قاراشادا العاش تەڭىزگە شىعارىلعان. 2008 جىلى تامىز ايىنان باستاپ رەسمي تۇردە اقش تەڭىز جاعالاۋىن قورعاۋشى كەمە رەتىندە شارلاۋ قىزمەتىن باستاعان. قازىرگى ۋاقىتتا «بەرتولف» كەمەسى اقش تەڭىز كۇشتەرىنىڭ تىنىق مۇحيت 7-ءشى فلوتىنا تيەسىلى.

قۇراما شتاتتىڭ اسكەري كەمەلەرىنىڭ وڭتۇستىك قىتاي تەڭىزىندەگى ارەكەتىنىڭ جيىلەۋى بەيجىڭ بيلىگىنە قىسىمدى ارتتىرا تۇسەدى. بۇل قىتاي ۇكىمەتىن الاڭداتپاي قويمايدى. سەبەبى، اقش اسكەري كەمەلەرى پارسى شىعاناعى، قىزىل تەڭىز، اراب تەڭىزى جانە افريكادان قىتايعا كىرەتىن نەمەسە قىتايدان اتالعان ايماقتارعا شىعاتىن تاسىمال كەمەلەرىنىڭ قاتىناسىن قيىنداتا تۇسەدى. بۇل ەڭ ءىرى ءوندىرۋشى ەل رەتىندە قىتايدىڭ ەكونوميكاسىنا وزىندىك كەرى اسەرىن تيگىزەدى.

 “The Qazaq Times”