فرانتسيا پرەزيدەنتى ەممانۋەل ماكرون پاريجدەگى قۇداي انا سوبورىن قايتا قالپىنا كەلتىرۋگە ءسوز بەردى.

"نوتر-دام - ءبىزدىڭ تاريحىمىز، ادەبيەتىمىز، جانىمىزدىڭ ءبىر بولشەگى. عيماراتتا ورىن العان ءورتتىڭ حالقىمىزدىڭ قابىرعاسىن قايىستىرعانىن سەزىپ تۇرمىن. الايدا، مەن ءۇمىت تۋرالى ايتقىم كەلەدى. ءبىز بۇل عيماراتتى 800 جىل بۇرىن تۇرعىزدىق. عاسىرلار بويىنا ونى ۇلكەيتىپ، جوندەۋدەن وتكىزدىك. بۇگىنگى وقيعادان كەيىن دە، مەن دە سىزدەرگە سەنىمدى تۇردە ايتا الام،  بىز بۇنى ءبارىمىز بىرگە قايتا قالپىنا كەلتىرەمىز" - دەدى ماكرون.

ازىرگە ءورتتىڭ نەدەن شىققانى بەلگىسىز. الايدا، لاۋازىمدى تۇلعالاردىڭ ايتۋىنشا، جوندەۋ جۇمىستارى كەزىندە شىققان بولۋى مۇمكىن.

سونداي-اق، حالىقارالىق ۇيىمدار مەن مەملەكەت باسشىلارى دا ورتكە بايلانىستى فرانتسۋز حالقىنا كوڭىل ايتىپ، قولداۋ كورسەتىپ جاتىر. ءوز كەزەگىندە، يۋنەسكو جىل سايىن شامامەن 13 ميلليون تۋريست كەلەتىن سوبوردى قايتا قالپىنا كەلتىرۋگە كومەكتەسەتىنىن حابارلادى. گەرمانيا كانتسلەرى انگەلا مەركەل نوتر-دامدى تەك فرانتسيانىڭ عانا ەمەس، "فرانتسيا مەن ەۋروپا مادەنيەتىنىڭ سيمۆولى" دەپ باعا بەردى. ال، ترامپ ءوزىنىڭ تۆيتتەر پاراقشاسىندا "ورىن العان ءورتتى كورۋدىڭ ءوزى قورقىنىشتى. ءورتتى ءسوندىرۋ ءۇشىن "ۇشاتىن سۋ تانكەرلەرىن" پايدالانسا دۇرىس بولار ەدى" دەپ جازدى.

سونداي-اق، فرانتسيا ميللياردەرى، Kering كومپانياسىنىڭ باسشىسى فرانسۋا-انري پينو نوتر-دام-دى قالپىنا كەلتىرۋگە 100 ميلليون ەۋرو اۋدارۋعا ۋادە بەردى. ال، فرانتسيا پرەزيدەنتى ەممانۋەل ماكرون سوبوردى قالپىنا كەلتىرۋ ءۇشىن حالىقارالىق فاندرايزينگ اشۋ قاجەتتىگىن ايتتى.

ايتا كەتەيىك، كەشە، ياعني، دۇيسەنبى كۇنى كەشتە پاريجدەگى قۇداي انا سوبورى ورتەنىپ، سالدارىنان  عيماراتتىڭ شاتىرى قۇلادى. رەسمي مالىمەتتەرگە سۇيەنسەك، ىشكى فاسادىنا دا زيان كەلگەن.  الايدا، توتەنشە جاعدايلار كوميتەتى قىزمەتكەرلەرى قۇندى جادىگەرلەر مەن ءدىني باعالى زاتتاردى سوبوردان الىپ شىعىپ ۇلگەرگەن. قازىر قاۋىپسىز جەردە.

فرانتسيانىڭ سيمۆولىنا اينالعان نوتر-دام سوبورى وسىدان 850 جىل بۇرىن XIII عاسىردا تۇرعىزىلعان. بۇگىن دە سوبوردى الەمنىڭ تۇكپىر-تۇكپىرىنەن جىلىنا شامامەن 13 ميلليونعا جۋىق تۋريست تاماشالۋعا كەلەدى. بۇل كورسەتكىش اتاقتى ەيفەل مۇناراسىنا كەلۋشىلەردىڭ سانىنان دا كوپ.

"The Qazaq Times"