ەلشىنىڭ كولىگىنە شابۋىل جاساعان. فوتو: Evening Standard.

ۋكراينانىڭ بريتانياداعى ەلشىسى شابۋىلعا ۇشىرادى. اعىلشىن پوليتسەيلەرى كۇدىكتىگە وق اتىپ ۋكراينا ەلشىسىن قورعاپ قالعان. بۇل تۋرالى بريتاندىق جانە فرانتسۋز اقپارات قۇرالدارى حابارلادى.

لوندون پوليتسياسىنىڭ مالىمەتىنە، ۋكراينانىڭ سول ەلدەگى توتەنشە جانە وكىلەتتى ەلشىسى ناتاليا گاليبارەنكو وتىرعان قىزمەت كولىگىنە ماقساتتى تۇردە شابۋىل جاسالعان. كۇدىكتى پوليتسيانىڭ ەسكەرتۋىنە قاراماستان جەكە كولىگىمەن ۋكراينا ەلشىسىنىڭ قىزمەت كولىگىن سوققان. اعىلشىن پوليتسياسى ەلشىنى قورعاۋ ماقساتىندا كۇدىكتىگە وق جاۋدىرعان.

وقيعادان كەيىن لوندون قاۋىپسىزدىك قىزمەتى مالىمدەمە جاساپ، كۇدىكتىنىڭ قولعا الىنعانىن، تەرگەۋ امالدارىنىڭ ءجۇرىپ جاتقانىن ايتقان.  قازىرگە پوليتسيا تارابىنان كۇدىكتىنىڭ ماقساتتى تۇردە شابۋىل جاساماق بولعانى تۇراقتاندىرىلعان.

“The Qazaq Times”