«TURKISTAN» گازەتىنە – 25 جىل.

«TURKISTAN» گازەتىنىڭ مەرەيتويى – قازاق ءباسپاسوزىنىڭ تويى. ەرتەڭ حالىقارالىق «TURKISTAN» گازەتىنىڭ 25 جىلدىعىنا وراي جۋرناليستەر اراسىندا بوۋلينگتەن تۋرنير وتەدى. وعان الماتى قالاسىنداعى اقپارات وكىلدەرى قاتىسىپ، باق سىنايدى. مۇنداعى ماقسات – ءتىلشى قاۋىمى اراسىنداعى اۋىزبىرلىك پەن ىنتىماقتى ارتتىرىپ، ارىپتەستىك بايلانىستى جانداندىرۋ.

ىرگەتاسىن 1994 جىلى «قازاقتىڭ قالتايى» – قازاقستاننىڭ حالىق جازۋشىسى قالتاي مۇحامەدجانوۆ قالاعان حالىقارالىق «TURKISTAN» گازەتىنىڭ جارىق كورە باستاعانىنا – 25 جىل. وسى جىلدار ىشىندە قالىڭ وقىرماندارىنان قول ۇزبەگەن گازەت قازاقستان رەسپۋبليكاسىنىڭ ساياسي-ەكونوميكالىق جانە مادەني-الەۋمەتتىك دامۋىنا اقپاراتتىق قولداۋ كورسەتۋ باعىتىندا ساراپتامالىق ماقالالار جاريالاۋدا بەلدى باسىلىمنىڭ قاتارىنا كىرەدى. ەلىمىزدىڭ الەۋمەتتىك-ەكونوميكالىق دامۋى، حالىقتىڭ ءال-اۋقاتى ماسەلەلەرىن ۇنەمى نازاردا ۇستاپ، تالداۋ ماقالالارى ارقىلى وزىندىك بەت-بەينەسىن قالىپتاستىرعان باسىلىمنىڭ باستى ۇستانىمى – ۋاقىت تالابىنان تۋىنداعان الەۋمەتتىك، ەكونوميكالىق رەفورمالاردىڭ ىشكى مازمۇنىن جانە قوعامنىڭ اتالمىش رەفورمالارعا وڭ كوزقاراسىن  قالىپتاستىرۋ.

بۇگىندە «TURKISTAN» حالىقارالىق گازەتى رەسپۋبليكانىڭ بارلىق وبلىستارىنا، الماتى مەن استانا قالالارىنا كەڭىنەن تارايدى جانە رەسەي فەدەراتسياسىنىڭ رەسمي كاتالوگىنا ەنگىزىلگەن.

وتەتىن جەرى; «باستاۋ» بوۋلينگ ورتالىعى

شاگابۋدتينوۆ كوشەسى، 109 «ا»

19 ناۋرىز ساعات 18:00