اقش-تا تەحنولوگيا قۇپيالارىن ۇرلاعان قىتاي عالىمى تۇتقىندالدى

قۇراما شتاتتاعى كەڭەسشىلىك القاسى اقش-تا تۇراتىن ءبىر قىتايلىق عالىمنىڭ ۇستىنەن شاعىم ءتۇسىرىپ، بيسفەنولسىز جابىندىلار تۋرالى ساۋدا قۇپيالىقتارىن ۇرلادى دەگەن ايىپ تاقتى.

بۇل تۋرالى اقش ادىلەت دەپارتامەنتىنىڭ مالىمدەمەسىندە، ميچيگاندا تۇراتىن يۋ شياۋروڭعا كوممەرتسيالىق قۇپيالاردى ۇرلاۋمەن قوسا اقشا اۋدارۋ الاياقتىعى قاتارلى 7 ءتۇرلى ايىپ تاعىلعان. يۋ شياۋروڭمەن قاتار قىتايدىڭ شاندوڭ پروۆينتسياسىنان بارعان ليۋ اتتى قىتايلىق ازامات تا بار ەكەنى ايتىلعان.

اقش ادىلەت مينيسترلىگىنىڭ وكىلدەرىنىڭ ايتۋىنشا، يۋ شياۋروڭعا قىتايلىق كومپانيالار ساۋدا قۇپيالارىن ۇرلاپ بەرۋ ءۇشىن 100 ملن اقش دوللارى كولەمىندە اقى بەرگەنى تۋرالى مالىمەتتەر بار. ونداعى ماقساتى – ۇرلانعان ساۋدا قۇپيالارى ارقىلى امەريكالىق كومپانيالارمەن باسەكەلەسە الاتىن جاڭا قىتايلىق كومپانيانى قۇرۋ ەكەنى ايتىلعان.

اتالعان دەپارتامەنتتىڭ مالىمەتىنە قاراعاندا، 56 جاستاعى يۋ شياۋروڭ حانىم 2012 جىلدىڭ جەلتوقسانىنان 2017 جىلدىڭ قىركۇيەگىنە دەيىن Atlanta كومپانياسىندا ساناۋلى نەگىزگى ينجەنەردىڭ ءبىرى بولىپ جۇمىس ىستەگەن. سونداي-اق، بيسفەنولسىز جابىندىلار تەحنولوگياسىنا قول جەتكىزۋى مۇمكىن ساناۋلى ادامداردىڭ ءبىرى بولعان.

قاتىستى رەسمي تۇلعالاردىڭ مالىمەتىنە قاراعاندا، قىتاي ءوزىنىڭ «مىڭ دارىندى» باعدارلاماسى ارقىلى عالىمدار مەن مامانداردى قۇراما شتاتتان زياتكەرلىك مەنشىك قۇقىعىن ۇرلاۋعا ىنتالاندىرادى.

اقش ادىلەت مينيسترلىگى بۇل ماسەلەگە بايلانىستى تەرگەۋدى كۇشەيتەتىنىن مالىمدەدى. سول ارقىلى قىتايعا مۇنداي قىلمىستاردىڭ ىسكەرلىك قىزمەتتە جانە ەكونوميكالىق دامۋدا قولايسىز تاجىريبەلەر ەكەنىن دالەلدەمەك.

الداعى ۋاقىتتا، اتالعان دەپارتامەنت ۇلتتىق قاۋىپسىزدىك سالالارىمەن سەلبەسە وتىرىپ، قۇراما شتاتتاعى زياتكەرلىك مەنشىك قۇقىعىن ۇرلاۋشى عالىم-ينجەنەرلەردى انىقتاۋدى قولعا الماق.

“The Qazaq Times”