سولتۇستىك كورەيا باسشىسى بەيجىڭ ساپارىندا. فوتو: VOA.

قىتايدىڭ رەسمي اقپارات قۇرالدارىنىڭ بۇگىنگى حابارلارىندا، قىتاي ورتالىق قالاسىندا رەسمي ساپاردا جۇرگەن سولتۇستىك كورەيا باسشىسى كيم جوڭ ۋن (كيم چەن ىن/Kim Jong Un) اقش-پەن اراداعى يادرولىق قارۋسىزدانۋ تۋرالى كەلىسسوزدەرى داعدارىسقا ۇشىراۋىنان الاڭدايتىنىن جەتكىزگەن. بىراق، ول قىتاي باسشىسى شي جينپيڭگە (سي تسزينپين/Xi Jinping) اقش-پەن قارىم-قاتىناستى جاقسارتۋعا تىرىساتىنىن ايتقان.

سولتۇستىك كورەيا باسشىسى قىتاي استاناسىندا ەكى كۇندىك رەسمي ساپاردا جۇرگەنى بەلگىلى. قىتايلىق باق-تىڭ حابارلارىندا ونىڭ بەيجىڭگە شي ءجينپيڭنىڭ شاقىرتۋىمەن ساپارلاي كەلگەنى ايتىلادى. بىراق، ساپاردىڭ ناقتى ماقساتى مەن كۇن ءتارتىبى تۋرالى مالىمەت بەرىلمەگەن. ءتىپتى، كيم جوڭ ۋن قىتاي باسشىسىمەن كەزدەسكەنگە دەيىن ونىڭ قىتاي ورتالىق قالاسىنا ساپارى تۋرالى ەشبىر حابار تاراتىلماعان.

بۇل سولتۇستىك كورەيا باسشىسىنىڭ بىلتىردان بەرى ءتورتىنشى رەت قىتايعا ساپارلاي بارۋى. كەيبىر ساراپشىلاردىڭ ايتۋىنشا، بۇل ساپار كيم جوڭ ۋننىڭ اقش پرەزيدەنتى ترامپپەن ەكىنشى رەت كەزدەسۋ وتكىزۋدىڭ الدىندا ءوز جوسپارلارىن ەڭ ۇلكەن ساياسي جانە ەكونوميكالىق سەرىگى بەيجىڭمەن ۇيلەستىرۋ ءۇشىن جاسالعان. وسىدان بۇرىن ترامپ سولتۇستىك كورەيا باسشىسىمەن قاڭتار نەمەسە اقپان ايىندا كەزدەسۋ وتكىزۋى مۇمكىن ەكەنىن ايتقان.

بولجامدارعا سەنسەك، بۇل كەزدەسۋدە قىتاي باسشىسى سولتۇستىك كورەياعا قولداۋ كورسەتۋ تۋرالى كيم جوڭ ۋنعا ءوز ۋادەسىن بەرەدى جانە كحدر مەن اقش قاتىناسى قاراما-قارسى باعىتتا ءوربيدى دەپ ۇمىتتەنەدى.

دەگەنمەن، كيم جوڭ ۋننىڭ بەيجىڭ ساپارىنا وڭتۇستىك كورەيا پرەزيدەنتى ءمۇن جاين (Moon Jea-in) ۇمىتكەرلىك تانىتتى. بۇگىن تاڭەرتەڭ جۋرناليستەرگە بەرگەن جاۋابىندا: «مەنىڭ ويىمشا، توراعا كيم چەن ىننىڭ بەيجىڭ ساپارى اقش پەن سولتۇستىك كورەيا ليدەرلەرىنىڭ ەكىنشى سامميتىنە جول اشادى دەپ قارايمىن»، – دەگەن.

“The Qazaq Times”