سينگاپۋرداعى تاريحي كەزدەسۋ. فوتو: Business Insider.

اقش پرەزيدەنتى دونالد ترامپ سارسەنبى كۇنى جاساعان مالىمدەمەسىندە، سولتۇستىك كورەيا باسشىسى كيم جوڭ ۋننان «اسا ماڭىزدى» حاتتى تاپسىرىپ العانىن، جاقىن ارادا كحدر جەتەكشىسىمەن كەزدەسۋى مۇمكىن ەكەنىن ايتتى.

ترامپ اق ۇيدە وتكەن مينيسترلەر كابينەتىنىڭ وتىرىسىندا: «ءبىز (سولتۇستىك كورەيا باسشىسىمەن) جاقسى قارىم-قاتىناس جاساۋدامىز، جاقىن ارادا كەزدەسەتىن بولامىز»، – دەپ مالىمدەدى.

ترامپتىڭ اتالعان مالىمدەمەسىنەن ءبىر كۇن بۇرىن، سولتۇستىك كورەيا باسشىسى كيم جوڭ ۋن جاڭا جىلعا ارنالعان مالىمدەمەسىندە قۇراما شتاتقا ەسكەرتۋ جاساعان بولاتىن. كحدر باسشىسى كيم جوڭ ۋن مالىمدەمەسىندە، ەگەر ۋاشينگتون تارابى سولتۇستىك كورەيانى يادرولىق قارۋدان باس تارتۋعا ماجبۇرلەۋ ءۇشىن سانكتسيالىق قىسىمداردى جالعاستىراتىن بولسا، وندا اقش-پەن قول جەتكىزگەن بارلىق تۇسىنىستىك سەلگە كەتۋى مۇمكىن ەكەنىن ەسكەرتكەن.

كيم جوڭ ۋن مالىمدەمەسىندە، سولتۇستىك كورەيا يادرولىق قارۋ وندىرمەۋگە، يادرولىق سىناق جاساماۋعا، يادرولىق ارسەنالىن پايدالانباۋعا جانە تاراتپاۋعا كەپىلدىك بەرە الاتىنىن جەتكىزگەن. سونداي-اق، بيىل اقش پرەزيدەنتى دونالد ترامپپەن قايتالاي كەزدەسۋ وتكىزۋدى جوسپارلاپ وتىرعانىن ايتقان.

اقش پەن وڭتۇستىك كورەيانى بارلىق بىرلەسكەن اسكەري وقۋ-جاتتىعۋدان باس تارتۋعا شاقىرعان كيم جوڭ ۋن، ۋاشينگتوننىڭ «ءتيىستى شارالار قابىلداۋ كەرەك» ەكەنىن، ولاي بولماعاندا پيوڭياڭ (پحەنيان) جاڭا قادامعا باراتىنىن ايتقان.

بۇل جولى سولتۇستىك كورەيا العاش رەت اقش پەن وڭتۇستىك كورەيادان ورتاق بەيبىتشىلىك دەكلاراتسياسىن شىعارۋدى تالاپ ەتتى. ايتالىق، 1953 جىلعى كورەي سوعىسىنان كەيىنگى اسكەري كەلىسىمدى وزگەرتىپ، اسكەري ارەكەتتەردى رەسمي تۇردە توقتاتۋعا شاقىرىپ وتىر. الايدا، ساراپشىلاردىڭ ايتۋىنشا، مۇنداي بەيبىتشىلىك دەكلاراتسياسى قابىلدانسا، قۇراما شتاتتاردىڭ وڭتۇستىك كورەياعا اسكەري ارالاسۋىن زاڭدىق تۇرعىدا شەكتەپ تاستاۋى مۇمكىن.

وڭتۇستىك كورەيانىڭ بىرىگۋ مينيسترلىگى (كورەي بىرلىگىن قالپىنا كەلتىرۋ تۋرالى ارنايى مينيسترلىك) جاساعان مالىمدەمەدە كيم جوڭ ۋننىڭ كەزەكتى مالىمدەمەسىنە وڭ باعاسىن بەرگەن. ايتالىق، اتالعان مينيسترلىك كيم جوڭ ۋننىڭ بۇل مالىمدەمەسى كورەي تۇبەگىنىڭ بەيبىتشىلىگى مەن ماڭىزدىلىعى جانە ەكى كورەيانىڭ باياندى قارىم-قاتىناسى ءۇشىن ۇلكەن بەتبۇرىس رەتىندە باعالاعان.

“The Qazaq Times”