حالىقارالىق وليمپيادا كوميتەتى رەسەي وليمپيادا كوميتەتىنە سپورتتىق اربيتراجدىق سوت (CAS) ۇكىمىن ورىنداۋ تۋرالى ءوتىنىش جولداعان. بۇل رەتتە حوك سپورتتىق اربيتراجدىق سوت (CAS) شەشىمىن قولداماعان ماسكەۋ قالالىق سوتىنىڭ شەشىمىنە الاڭداۋلى.

ەگەر وليمپيالىق حارتيا ورىندالماعان جاعدايدا حوك رەسەيدىڭ ارەكەتىنە قاتىستى ءتۇرلى سانكتسيالار قابىلداۋى مۇمكىن. بۇل رەتتە رەسەيدىڭ وليمپيادالىق قۇراماسى 2020 جىلى توكيودا وتەتىن وليمپيادا ويىندارىنان شەتتەتىلۋى مۇمكىن. رەسەي وليمپيادا كوميتەتى ماسكەۋ قالالىق سوتىنىڭ شەشىمىنە بايلانىستى اپەللياتسيا بەرىپ قويعان.

22 قاراشا كۇنى حالىقارالىق وليمپيادا كوميتەتى رەسەي بوبسلەي فەدەراتسياسىنىڭ پرەزيدەنتى الەكساندر زۋبكوۆتان ەكى التىن مەدالدى قايتارۋدى تالاپ ەتكەن. بۇعان دەيىن ءبىر كۇن بۇرىن ماسكەۋ قالالىق سوتى زۋبكوۆتىڭ وليمپيادا چەمپيونى مارتەبەسىن وزىندە قالدىرۋ تۋرالى جانە CAS شەشىمىنە قاراماستان ماراپاتتاردى ساقتاۋ تۋرالى شەشىم شىعارعان. «سۋديا CAS شىعارعان شەشىمدى مويىنداعان جوق. رەسەي تەرريتورياسىندا. دالەلدەر بولمادى. وسىلايشا، رەسەي تەرريتورياسىندا مەنى وليمپيادا چەمپيونى رەتىندە تانۋ شەشىمى قابىلداندى» دەپ مالىمدەدى زۋبكوۆ.

ەسكە سالا كەتسەك، 2017 جىلدىڭ قاراشا ايىندا زۋبكوۆ 2014 جىلى سوچي وليمپياداسىندا دوپينگكە قارسى ەرەجەلەردى بۇزدى دەپ ايىپتاپ، ءومىر بويىنا سپورتتان شەتتەتكەن. سپورتشى سوچي وليمپياداسىنداعى ەكى التىن مەدالىنەن ايىرىلىپ قالعان ەدى. كەيىنىرەك CAS ءومىر بويىنا سپورتتان شەتتەتۋ ۇكىمىنىڭ كۇشىن جويدى. الايدا زۋبكوۆقا تيەسىلى ەكى التىن مەدالدى قايتارىپ بەرگەن جوق.

"The Qazaq Times"