ارمەنيانىڭ بۇرىنعى پرەزيدەنتى سەرج سارگسيان «1 ناۋرىز ءىسى» بويىنشا تەرگەۋگە الىنباق. (2008 جىلى ەرەۆاندا قارسىلىق شاراسى ءوتىپ، وندا 10 ادام قازا تاپقان ەدى). بۇل تۋرالى «abhaber.com» حابارلايدى.

«مەن 2008 جىلعى ىسكە قاتىسى بار ادام مىندەتتى تۇردە جاۋاپقا تارتىلاتىنىن ايتقانمىن. سەرج سارگسيان دا بۇل جازادان قۇتىلمايدى»، - دەگەن ارمەنيانىڭ ارنايى تەرگەۋ قىزمەتىنىڭ باسشىسى ساسۋن حاچاتريان. دەگەنمەن، ارمەنيانىڭ ءۇشىنشى پرەزيدەنتىنىڭ قايدا تەرگەلەتىنى ازىرگە بەلگىسىز.

ەسكە سالايىق، 2008 جىلدىڭ 1 ناۋرىزىندا پرەزيدەنت سايلاۋىنىڭ قورىتىندىسىنا نارازى حالىق مىڭداعان قارسىلىق اكتسياسىن وتكىزگەن ەدى. وندا، 10 ادام قازا تاۋىپ، 250 ادام اۋىر جاراقات العان بولاتىن. ارمەنيانىڭ ارنايى تەرگەۋ قىزمەتى وسى جىلدىڭ 26 شىلدەسىندە وسى قارسىلىق شاراسىنا شىعۋشىلاردى ارانداتتى دەگەن ايىپپەن ارمەنيانىڭ بۇرىنعى پرەزيدەنتى روبەرت كوچارياندى ەكى ايعا قاماۋعا العان ەدى.  ەندى، س.سارگسيانعا دا وسىنداي ايىپ تاعىلۋدا.

“The Qazaq Times”