اقش تاراپىنان جاسالعان ەكونوميكالىق قىسىم ارەكەتتەرى يرانعا ەشقاشان دا تاياۋ شىعىستاعى ءوزىنىڭ ساياساتىن وزگەرتتىرە المايدى. بۇل تۋرالى دۇيسەنبى، 13 تامىزدا يران يسلام رەسپۋبليكاسىنىڭ ءسىم باسشىسى دجاۆاد زاريف «ءال-جازيرا» تەلەارناسىنا بەرگەن سۇحباتىندا مالىمدەگەن.

«يران ەشقاشان دا اقش- تىڭ سانكتسيالارىنا بولا ايماقتاعى ساياساتىن وزگەرتپەيدى»، - دەگەن ول. د.زاريف سونىمەن قاتار، ۋاشينگتونمەن كەلىسسوز جاساسۋدىڭ مۇمكىن ەمەستىگىن دە ايتقان. «ءبىز بىرىككەن شتاتتارمەن ولار سانكتسيا ارەكەتتەرىن توقتاتىپ، وزگە ەلدەردى سىيلاپ، مەملەكەت سياقتى ارەكەت ەتكەندە عانا ديالوگ جاساساتىن بولامىز» ، - دەگەن.

ايتا كەتەتىن جايت، وسىدان بۇرىن، ياعني دۇيسەنبى كۇنى ير-نىڭ رۋحاني جەتەكشىسى، اياتوللا ءالي  حامەنەي دە اقش-پەن قانداي دا ءبىر كەلىسسوزدەر جاساسۋعا قارسىلىعىن بىلدىرگەن ەدى.

بارىمىزگە بەلگىلى، وسى جىلدىڭ مامىر ايىندا اقش پرەزيدەنتى دونالد ترامپ «ورتاق قادام جان-جاقتى باعدارلاماسىنان» شىعاتىنىن مالىمدەپ، بۇرىنعى سانكتسيالاردىڭ قاتارىنا جاڭالارىن ەنگىزەتىنىن ايتقان ەدى. امەريكالىق سانكتسيالاردىڭ ءبىرىنشى بولىگى 7 تامىزعا قاراعان ءتۇنى ەنگىزىلگەن بولاتىن.

“The Qazaq Times”