قازاق تەاترى «قاراگوزىمەن» قوشتاستى

 قازاق ونەرىنىڭ مادەنيەت كەڭىستىگىندە ورنى تولماس قايعى ورىن الىپ، قازاقستاننىڭ حالىق ءارتيسى، تەاتر جانە كينو اكتريساسى شىعارماشىلىق ءومىرىنىڭ 60 جىلعا جۋىق ۋاقىتىن مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنا ارناعان، ونەر قايراتكەرى زامزاگۇل تۇسىپبايقىزى ءشارىپوۆا ۇزاققا سوزىلعان اۋىر ناۋقاستان دۇنيە سالعان بولاتىن.

تەاتردا مارقۇمنىڭ سوڭعى ساپارعا شىعارىپ سالۋعا ارنالعان قارالى ميتينگى ءوتتى. وعان استانادان قازاقستان رەسپۋبليكاسىنىڭ مادەنيەت جانە سپورت ءمينيسترىنىڭ جاۋاپتى حاتشىسى قۋاتجان سەرىكقازىۇلى ۋاليەۆ ارنايى كەلىپ، قايعىلى قازاعا قاتىستى قازاقستان رەسپۋبليكاسىنىڭ پرەزيدەنتى اتىنان كەلگەن جەدەلحاتتى وقىپ بەردى.

«زامزاگۇل نۇسىپبايقىزى ۇلتتىق دراماتۋرگيا سالاسىنداعى تالانتتى اكتەرلەر شوعىرىنىڭ بەلدى وكىلدەرىنىڭ ءبىرى بولاتىن. ونىڭ كينودا جانە تەاتر ساحناسىندا سومداعان ايشىقتى رولدەرىن ونەرسۇيەر قاۋىم ءاردايىم قىزىعا تاماشالادى. ول ەشكىمگە ۇقسامايتىن قايتالانباس قولتاڭباسى ارقىلى ءوز سالاسىندا ايرىقشا ءىز قالدىردى. زامزاگۇل ءشارىپوۆانىڭ قازاق ونەرىندەگى ەرەكشە ورنى مەن جارقىن ديدارى ەشقاشان ۇمىتىلمايدى دەپ سەنەمىن»، – دەلىنگەن جەدەلحاتتا.

بۇل قارالى جيىندى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى، قازاقستاننىڭ ەڭبەك سىڭىرگەن قايراتكەرى اسحات ماكسيمۇلى ماەميروۆ جۇرگىزدى.

-        زامزاگۇل نۇسىپبايقىزى ءشارىپوۆا - ءبىزدىڭ م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا 60 جىلعا جۋىق ءوزىنىڭ شىعارماشىلىق قىزمەتىن، عۇمىرىن ارنادى. وسى جىلداردىڭ ىشىندە ۇلتتىق جانە الەمدىك كلاسسيكالىق دراماتۋرگيالاردا جۇزدەن استام بەينەلەردى سومدادى. ءبىر-بىرىنە ۇقسامايتىن جۇزدەن استام ارۋلاردىڭ «وبرازدار گالەرەياسىن» جاسادى. سولار ساحنالىق كەيىپكەرلەردىڭ ىشىندەگى ەڭ شوقتىعى بيىگى م.اۋەزوۆتىڭ «قاراگوز» تراگەدياسىنداعى قاراگوز بەينەسى بولىپ ەسەپتەلەدى. قاراگوز – ز.ءشارىپوۆانىڭ ساحنالىق بويتۇمارى، تەاتر ونەرىندەگى «تولقۇجاتى». قاراگوزدىڭ ىشكى پسيحولوگيالىق يىرىمدەرىن، قويىلىمداعى جىندانار ساتتەگى ەموتسيالىق جاي-كۇيىن زامزاگۇل اپاي كاسىبي شەبەرلىكتىڭ شىڭىنا جەتكىزىپ تۇرىپ سومداي ءبىلدى. كورەرمەننىڭ جۇرەگىنە جەتكىزە ءبىلدى. سوندىقتان ءبىزدىڭ قازاق تەاترىنىڭ تاريحىنا قاراگوز بەينەسى التىن ارىپتەرمەن جازىلىپ قالدى.

ۇلى جازۋشى م.اۋەزوۆتىڭ ءوزى دە زامزاگۇل ءشارىپوۆانىڭ داۋىسىنا، وبراز سومداۋداعى شەبەرلىگىنە ءتانتى بولىپ، «تراگەدياداعى مەن سۋرەتتەگەن، جازعان قاراگوزدىڭ بولمىس-ءبىتىمىن زامزاگۇل ءشارىپوۆا شىنايى، وتە بيىك دەڭگەيدە جەتكىزدى» دەپ باعا بەرۋى، تەگىننەن-تەگىن ەمەس. ءتىپتى، داۋىس مانەرىنە، ۇنىنە، قوڭىر داۋىسىنا تامسانىپ «سەنىڭ اتىڭ زامزاگۇل ەمەس، ءزامزام-كاۋسار! سەبەبى سەنىڭ داۋسىڭدا كەرەمەت كاۋسار ءۇن بار!» دەپ باعا بەرگەنى كورەرمەندەردىڭ جادىندا.

امبەبەپ ونەر شەبەرى. تەك تەاتر عانا ەمەس، سونىمەن بىرگە كينو، دۋبلياج، راديو سالاسىندا تىندىرىمدى ەڭبەك ەتىپ، ءوز قولتاڭباسىن قالدىردى. سان ۇرپاق قازاق راديوسىنان زامزاگۇل ءشارىپوۆا وقىعان ەرتەگىلەردى تىڭداپ، حالىق اۋىز ادەبيەتىنەن سۋسىنداپ، تاعىلىم الىپ ءوستى. سوندىقتان ۇلانعايىر ەلىمىزدەگى بىرنەشە بۋىن ۇرپاق ءۇشىن، زامزاگۇل ءشارىپوۆا – قازاق ونەرىنىڭ اياۋلى اناسى.

ادىلعازى باقىتۇلى كەرەەۆ

“The Qazaq Times”