تۇركيا ءمينيسترى: «كۇرد جاساعىن جەڭبەيىنشە، اسكەرىمىزدى يراكتان شىعارمايمىز»

تۇركيا ۇلتتىق قورعانىس ءمينيسترى نۋرەتتين دجانيكلي ايماقتاعى تەررورلىق توپتاردىڭ بەتىن قايتارمايىنشا، تۇرىك اسكەري كۇشتەرىنىڭ يراكتىڭ سولتۇستىگىنەن شىعارىلمايتىنىن حابارلادى. بۇل تۋرالى ول «انادولۋ» اگەنتتىگىندە وتكەن دوڭگەلەك ۇستەلدە كەڭىرەك بايانداعان، دەپ حابارلايدى «meydan.com.tr» باسىلىمى.

مينيستر يراكتىڭ سولتۇستىگىندەگى انتيتەررورلىق وپەراتسيالارعا قاتىستى پىكىرىن ايتا كەلە، "تۇركيا اسكەري كۇشتەرى تاراپىنان يراك تەرريتورياسىندا قۇرىلعان بەكىنىستى اۋدانداردىڭ قورعانىسى كۇشەيۋدە. ەندى، وپەراتسيانىڭ كەلەسى كەزەڭى باستالادى»، - دەدى. ءارى ول كۇرد جۇمىسشىلار پارتياسى (PKK) ۇنەمى تۇركياعا يراكتىڭ سولتۇستىگىنەن شابۋىلدار ۇيىمداستىراتىنىن دا ايتىپ: «تۇركيا مەن اقش-تىڭ سوڭعى كەلىسىمشارتىنا سايكەس، سۇريالىق مانبيدجدەگى «كۇردتەردىڭ حالىقتىق قورعاۋ وتريادىن» (YPG)» امەريكالىق جانە تۇركيالىق اسكەريلەر باقىلايتىن بولادى", - دەدى.

ەسكە سالايىق، رەسمي انكارا مەن ۆاشينگتون ءسۇريانىڭ مانبيدج قالاسى بويىنشا «جول كارتاسىن» قابىلداپ، ونى 10 كۇن ىشىندە ىسكە اسىرۋعا ۋاعدالاسقان ەدى. وسى ۋاعدالاستىققا بايلانىستى، كۇرد جاساعى ول اۋماقتى تولىعىمەن بوساتىپ، قولدارىنداعى قارۋ-جاراقتى تاپسىرۋى ءتيىس ەدى. الايدا، قازىرگى ۋاقىتتا بۇل تالاپ ەشقانداي ناتيجە بەرمەگەن، - دەپ حابارلايدى، تۇرىك ءباسپاسوز قۇرالدارى.

“The Qazaq Times”