جىل سوڭىنا دەيىن ەلىمىزدە 30 حالىققا قىزمەت كورسەتۋ ورتالىعى جابىلادى. بۇل تۋرالى "ازاماتتارعا ارنالعان ۇكىمەت" مەملەكەتتىك كورپوراتسياسى مالىمدەدى. 

جاۋاپتىلار مۇنداي شەشىم قابىلداۋعا - بۇقارانىڭ ەلەكتروندى ۇكىمەت پورتالىن ءجيى قولدانا باستاۋى تۇرتكى بولدى دەيدى. تۇرعىنداردىڭ دەنى قازىر وزدەرىنە قاجەتتى قۇجاتتاردى ۇيلەرىندە وتىرىپ-اق، پورتال ارقىلى الادى-مىس. جۋىردا جابىلاتىن حالىققا قىزمەت كورسەتۋ ورتالىقتارىنىڭ كوبى وڭتۇستىك قازاقستان وبلىسىندا ورنالاسقان. ونداعى 15-كە جۋىق مەكەمە كوپ ۇزاماي قىزمەتىن دوعارادى. الماتىدا 4 بىردەي ورتالىق وسى ايدىڭ سوڭىندا ەسىكتەرىنە قۇلىپ ىلەدى.

ءجا، تۇرعىنداردىڭ ەلەكتروندى پورتالدى جاپپاي مەڭگەرۋىن ءجون دەرسىڭ. بىراق الگى سايتتان وزىڭە قاجەتتى بارلىق قۇجاتتى راسىمدەي الاسىڭ دەۋ - استە ابەستىك. پورتالدان مەكەن-جاي انىقتاماسى سىندى لەزدە ءازىر بولاتىن قۇجاتتاردى الۋعا بولاتىن شىعار. بىراق ودان وزگەلەرى - ورتالىق قىزمەتىنە جۇگىنبەسەڭ، شەشىمى وڭاي تابىلاتىن شارۋا ەمەس.

وسى تۇستا، قارتتارعا قايتپەك كەرەك؟ ەگدە جاستاعى ادامداردىڭ اراسىندا  كومپيۋتەردى جەتىك مەڭگەرگەندەرى بىرەن-ساران. بىلمەگەن سوڭ، البەتتە، ورتالىققا قايتا اعىلادى. جاقىن ماڭداعى مەكەمە جابىلىپ قالسا، قاشىققا قاتىناۋىنا تۋرا كەلەدى. وسىدان بارىپ، قاۋساعان قاريالار سەڭدەي سوعىلىسىپ، تاعى تەنتىرەيدى. ناتيجەسى - سابىلعان ادام، كۇتتىرگەن كەزەك، ۇلارداي شۋلاسقان جۇرت...

“The Qazaq Times”