دۇنيەجۇزىنىڭ گەوگرافيالىق كارتاسىندا وزگەرىس بولۋى مۇمكىن. كەشە رۋمىنيا پارلامەنتى تاريحتا "بەسسارابيا" دەگەن اتاۋمەن بەلگىلى مولدوۆا جەرىنىڭ رۋمىنيامەن بىرىگۋىنىڭ 100 جىلدىعىنا وراي وتكىزىلگەن ەسكە الۋ جيىنىندا مولدوۆامەن بىرىگۋ نيەتىن بىلدىرەتىن دەكلاراتسيا جاريالادى، دەپ حابارلايدى " kamuoyu.org"

رۋمىنيا حالقىنىڭ مولدوۆامەن بىرىگۋ تىلەگىن جەتكىزگەن بۇل دەكلاراتسيا ارقىلى، مۇنداي باستامانىڭ مولدوۆا حالقىنىڭ شەشىمىمەن عانا جۇزەگە اسىرىلاتىنى، رۋمىنيا حالقىنىڭ وسى تاريحي شەشىمگە دايىن ەكەندىگى حابارلاندى.

"ءبىر ۇلىس، ءبىر ۇلت رەتىندە تانىلۋدى ۇسىنامىن"

دەكلاراتسيادا بەسسارابيا ايماعىنىڭ "اتاجۇرتپەن" بىرىگۋىنىڭ 100 جىلدىعىندا وسى ايماقتىڭ بۇگىنگى اتاۋى مولدوۆا مەن رۋمىنيانىڭ قايتادان بىرىگۋ تىلەكتەرىنىڭ زاڭدى جانە دۇرىس ەكەندىگى دە تىلگە تيەك ەتىلگەن. پارلامەنتتىڭ ەسكە الۋ جيىنىندا ءسوز العان سوتسيال-دەموكراتيالىق پارتياسىنىڭ (PSD) باسشىسى ليۆيۋ دراگنيا، ەۋروپا قاۋىپسىزدىك جانە ىنتىماقتاستىق ۇيىمىنىڭ 1975 جىلعى حەلسينكي اكتىسىنە نازار اۋدارتتى. ول بۇل اكتىنىڭ ەۋروپا حالىقتارىنىڭ ء"وزىن-ءوزى انىقتاۋ جانە تەڭ قۇقىلىق" قاعيداسى قۇقىعىنا ارنالعانىن اتاپ ءوتىپ، "مەن رۋمىنيانىڭ مولدوۆامەن قوسىلىپ، ەۋروپا ساحناسىندا ءبىر ۇلىس، ءبىر ۇلت رەتىندە تانىلۋىن ۇسىنامىن", - دەدى.

مولدوۆا دا بىرلەسۋگە "كەتارى" ەمەس

رۋمىنيا پارلامەنتىنىڭ "رۋمىن حالقى مەن مولدوۆانىڭ بىرىگۋى" اتتى جيىنىنا مولدوۆا پارلامەنتى مەن مولدوۆا ۇكىمەتىنىڭ وكىلدەرى دە قاتىسقان. مولدوۆا پارلامەنتى باسشىسى ارديان دجاندۋ ءوز سوزىندە مولدوۆا حالقىنىڭ رۋمىنيانىڭ قولداۋىنا مۇقتاج ەكەنىن ايتىپ، بۇگىنگە دەيىن ەۋروپاعا اپاراتىن جولدار مەن كوپىر قۇرىلىستارىنىڭ جانە وزگە دە ايماقارالىق ىستەردىڭ تەك رۋمىنيانىڭ كومەگىمەن عانا جۇزەگە اسىرىلعانىن جاسىرمادى.

تاريحتا "ۇلى رۋمىنيانىڭ" ءبىر بولشەگى رەتىندە قاراستىرىلىپ كەلگەن مولدوۆا مەن بەسسارابيا ايماعى، وسمان يمپەرياسى مەن رەسەي اراسىنداعى سوعىس سالدارىنان 19 عاسىردا وسمان يمپەرياسىنىڭ قۇرامىنان شىعىپ، رەسەيگە وتكەن بولاتىن.

 

“The Qazaq Times”