تۇركيا پرەمەر-ءمينيسترىنىڭ ورىنباسارى بەكير بوزداگ.

اقش سىرتقى ىستەر مينيسترلىگى اقش ۇكىمەتىنىڭ افريندەگى وقيعالارعا الاڭداۋشىلىق بىلدىرەتىنىن مالىمدەگەننەن كەيىن، تۇركيا پرەمەر-ءمينيسترىنىڭ ورىنباسارى بەكير بوزداگ اقش-تىڭ ء"زايتۇن بۇتاعى" وپەراتسياسىنىڭ ماقساتى مەن ءمان-جايىن ءالى تۇسىنە الماعاندىعىن نەمەسە تۇسىنگىسى كەلمەيتىنىن ايتىپ، اق ءۇي مالىمدەمەسىمەن كەلىسە قويمايتىندىعىن جاسىرمادى.

ول "Twitter" الەۋمەتتىك جەلىسىندەگى پاراقشاسىندا جاساعان مالىمدەمەسىندە: ء"زايتۇن بۇتاعى" وپەراتسياسى دايش-پەن كۇرەس ارەكەتتەرىنە كەرى اسەرىن تيگىزۋدە دەگەن پىكىر نەگىزسىز ءارى جالعان. ء"زايتۇن بۇتاعى" وپەراتسياسى جازىقسىز تۇرعىندار مەن كۇرد ازاماتتارىنا قارسى ۇيىمداسقان توپ ەمەس. ول - تەررورلىق ۇيىمدارعا قارسى ۇيىمداستىرىلعان قوزعالىس. ايماقتى تەررورلىق توپتاردان ارىلتۋدى، حالىقتى ولاردىڭ قىسىمدارى مەن زۇلىمدىق ارەكەتتەرىنەن قۇتقارۋدى، ايماقتا تىنىشتىق، بەيبىتشىلىك، تۇراقتىلىق جانە قاۋىپسىزدىك ورناتۋدى كوزدەگەن ۇيىم. دايش ۇيىمى ەڭ كوپ تەررورلىق ارەكەت جاساعان، سونىمەن قاتار، دايش-قا قارسى وتە ءتيىمدى جانە شەشۋشى كۇرەستەر جۇرگىزگەن ءارى دايش-قا ەڭ ۇلكەن سوققى جاساعان ەل — تۇركيا" ، - دەپ، تاقىرىپقا اسا قاتىسى بولا قويماسا دا، دايش-تىڭ تۇركياعا تيگىزگەن زيانىن دا ايتىپ قالدى.

"دەموكراتيالىق وداق"  پارتياسى (PYD) مەن "كۇردتەردىڭ حالىقتىق قورعاۋ وتريادى" (YPG) تەررورلىق ۇيىمدارىنىڭ سيريا دەموكراتيالىق كۇشتەرى (SDG) دەگەن اتاۋمەن قولداۋ تاۋىپ جانە دايش-تى سىلتاۋراتىپ ولاردىڭ قارۋلاندىرىلىپ، جاساقتالعانىن دا تىلگە تيەك ەتكەن بوزداگ، "ەڭ ءبىر كوكەيگە قونىمسىز بولعانى — ايماقتا تەررورلىق ءدالىزدىڭ، تەررورلىق مەملەكەتتىڭ قۇرىلۋىنا قولداۋ كورسەتەتىن قادامداردىڭ جاسالۋى، تۇركيانىڭ باسىنداعى قيىن جاعداي مەن تۇرىك ۇكىمەتىنىڭ جاساعان ەسكەرتۋلەرىن ەلەمەۋ، تۇركيامەن ىنتىماقتا بولۋدىڭ ورنىنا تەررورلىق ۇيىمدارمەن ىنتىماقتا بولۋ. ء"زايتۇن بۇتاعى" وپەراتسياسى ازاماتتارعا ەشقانداي زيان كەلتىرمەدى. كەرىسىنشە، ولاردىڭ سۋ، ءدارى-دارمەك جانە وزگە دە گۋمانيتارلىق كومەكتەرگە قول جەتكىزۋلەرىنە ەشقاشان كەدەرگى بولمادى", - دەدى.

ماسەلەنىڭ استارىنا ۇڭىلسەك، اقش سىرتقى ىستەر مينيسترلىگىنىڭ ءباسپاسوز حاتشىسى حيزەر نويەرت افريننەن سوڭعى 48 ساعاتتا جەتكەن حابارلارعا بايلانىستى قاتتى الاڭدايتىنىن ءبىلدىرىپ، تۇركيانىڭ ء"زايتۇن بۇتاعى" وپەراتسياسىنا كىنا ارتقان بولاتىن. ول ءوز مالىمدەمەسىندە اتالعان وپەراتسيانىڭ تەررورلىق ۇيىمدارمەن كۇرەسكە كەرى اسەرىن تيگىزىپ جاتقاندىعىن ايتقان ەدى.  قازىرگى ۋاقىتتا تۇركيا ۇكىمەتى اتالعان ماسەلەگە قاتىستى تولاسسىز مالەمدەمەلەر جاساۋدا. الەم كوز تىككەن افريندەگى وقيعالار مەن ء"زايتۇن بۇتاعى" وپەراتسياسىنا قاتىستى مەملەكەتارالىق داۋدىڭ سوڭى نەمەن بىتەرى ازىرگە بۇلىڭعىر.

“The Qazaq Times”