100 مىڭ ەلورسا. فوتو: Twitter

ۆەنەسۋەلادا قولما-قول اقشا تاپشىلىعى سالدارىنان بالاما ۆاليۋتالار شىعارىلا باستادى. ەلدىڭ اپۋرا شتاتىنداعى ەلورسا قالاسىندا وسى اتتاس ۆاليۋتا شىعارىلدى. بۇل تۋرالى پارلامەنت دەپۋتاتى حوسە گەررا ءوزىنىڭ تۆيتتەر پاراقشاسىندا جازىپ، 100 مىڭ ەلورسانىڭ سۋرەتىن جاريالاعان. 

"قولما-قول اقشا داعدارىسى باستالعاندىقتان، اينالىمعا جەرگىلىكتى ۆاليۋتالار ەنگىزىلىپ جاتىر. مىنە مىناۋ اپۋرا شتاتىنىڭ ەلورسا قالاسىنىڭ اتىمەن اتالعان "ەلورسا" ۆاليۋتاسى. گيپەرينفلياتسيا مەن قولما-قول اقشانىڭ جەتىسپەۋشىلىگىنەن ەلدە كىشىگىرىم ورتالىق بانكتەر پايدا بولا باستادى", - دەپ جازعان گەررا.

سونداي-اق، جەرگىلىكتى ۆاليۋتانى العاش بولىپ ۆەنەسۋەلانىڭ استاناسى كاراكاستىڭ كاتيا دەپ اتالاتىن اۋدانىنىڭ وكىلدەرى 2017 جىلدىڭ جەلتوقسان ايىنان باستاپ پايدالانا باستاعان. جەرگىلىكتى ۆاليۋتا "پانال" دەگەن اتاۋعا يە بولعان. 1 پانال كۋرسى 5 مىڭ بوليۆارعا تەڭ بولعان.

كاراكاستىقتار جەكەمەنشىك اقشانى ىشكى كوممۋنالدىق تولەم كەزىندە پايدالاندى.

ايتا كەتەيىك، ەلدەگى ەكونوميكا جاعدايىنىڭ قيىنداۋى ينفلياتسيا دەڭگەيىن كوتەردى. قازىرگى كەزدە قارا نارىقتا 1 دوللار 226 مىڭ بوليۆاردى قۇرايدى، الايدا DICOM  جۇيەسىندە رەسمي ايىرباستاۋ كۋرسى 44 مىڭ بوليۆاردى قۇرايدى. سونداي-اق، ەلدە قولما-قول اقشا جەتكىلىكسىز، ال بيلىك ءبىراز ۋاقىت بۇرىن نومينالى 100 مىڭ بوليۆاردى اينالىمعا شىعاردى. مۇنىڭ قۇنى قارا نارىقتا بار بولعانى 0,5 دوللاردى قۇرايدى.

Bloomberg اگەنتتىگىنىڭ ەسەبى بويىنشا ەكونوميكاسى "باقىتسىز" ەلدەر تىزىمىندە ۆەنەسۋەلا تورت جىل قاتارىنان الدىڭعى ورىندا تۇر.

“The Qazaq Times”