رەسەي مەن ۇلىبريتانيا قاتىناسى تاريحتاعى ەڭ شيەلەنىستى جاعدايعا جەتتى

ۇلىبريتانيا ۇكىمەتى 23 رەسەيلىك ديپلوماتتى ەلدەن شىعارعاننان كەيىن، ماسكەۋ بيلىگى دە قارىمتاسىن قايتاردى. كرەملدىڭ شەشىمىمەن 23 بريتانيالىق ديپلوماتتى ەلدەن شىعارۋعا بۇيرىق بەردى. ەستەرىڭىزدە بولسا، ۇلىبريتانيا ۇكىمەتى «رەسەيلىك اگەنتكە اسا ۋلى زاتپەن قاستاندىق جاساۋ» ىسىنە ماسكەۋدى ايىپتى دەپ تاۋىپ، رەسەي ديپلوماتتارىن ەلدەن قۋعان بولاتىن. بۇل تۋرالى «WSJ» باسىلىمى حابارلادى.

رەسەيدىڭ سىرتقى ىستەر مينيسترلىگى سول ەلدەگى بريتانيا ەلشىسىن شاقىرتىپ، اتالعان شەشىممەن تانىستىردى جانە بريتانيالىق ديپلوماتتاردىڭ رەسەيدەن شىعىپ كەتۋىنە ءبىر اپتا ۋاقىت بەرگەنىن جەتكىزدى. رەسەي ءسىم-ءنىڭ جاساعان مالىمەتىندە: «بۇل قادام – بريتانيانىڭ رەسەيدى نەگىزسىز ايىپتاۋى مەن بىرجاقتى پروۆاكاتسياسىنا بەرگەن جاۋابىمىز»، – دەلىنگەن.

رەسەي ءسىم-ءىنىڭ مالىمدەمەسىندە ۇلىبريتانيانىڭ پەتەربورداعى باس ەلشىلىگىنىڭ وكىلەتتىلىگى جويىلاتىنى ايتىلعان. وعان قوسا مادەنيەت پەن ءبىلىم سالاسىنداعى الماسۋلاردى ۇيىمداستىرىپ كەلگەن بريتاندىق كەڭەس (British Council) جۇمىسىن توقتاتۋى كەرەك ەكەنىن العا تارتتى.

وتكەن ءبىر اپتادا ۇلىبريتانيا مەن رەسەي اراسىنداعى قايشىلىق «قىرعي قاباق سوعىس» اياقتالعاننان بەرگى ەڭ تومەنگى كورسەتكىشكە جەتتى. ۇلىبريتانيانىڭ لاۋازىمدى تۇلعالارى جۇما كۇنى: «رەسەي پرەزيدەنتى ۆلاديمير پۋتين بۇيرىق بەرىپ، سەرگەي سكريپال مەن ونىڭ قىزىنا قاستاندىق جاسادى، قازىر بۇل ەكى ادامنىڭ ءحالى تىم اۋىر جاعدايدا»، – دەپ مالىمدەدى. وسىدان كەيىن ۇلىبريتانيا ۇكىمەتى شەشىم شىعارىپ، 23 رەسەيلىك ديپلوماتتان ارالدى ەلدەن شىعىپ كەتۋدى تالاپ ەتكەن.

بۇعان قوسا بريتانيانىڭ قاۋىپسىزدىك ۇيىمدارى مەن ارناۋلى دەپارتامەنتتەرى قوسىمشا شارالاردى قابىلداۋ ماقساتىندا جينالىس اشقانىن مالىمدەگەن.

بۇل رەسەي مەن باتىس اراسىنىڭ ءتىپتى دە الشاقتاپ، رەسەيگە قاراتىلعان سانكتسيا قىسىمىنىڭ ءتىپتى دە ارتا تۇسەتىنىن كورسەتەدى.

“The Qazaq Times”